اۋىل ماڭىنداعى جايىلىمدار ماسەلەسىن قاراستىرامىز - ب. ساعىنتايەۆ

كوكشەتاۋ. قازاقپارات - جەر ماسەلەسى بويىنشا اقمولا وبلىسى تۇرعىندارىنىڭ ۇسىنىستار جۇيەلەنىپ، قاراستىرىلادى.

بۇل تۋرالى بۇگىن جەر رەفورماسى جونىندەگى كوميسسيانىڭ كوكشەتاۋداعى العاشقى كوشپەلى وتىرىسىندا ۇكىمەت باسشىسىنىڭ ءبىرىنشى ورىنباسارى، كوميسسيا جەتەكشىسى باقىتجان ساعىنتايەۆ ءمالىم ەتتى.

«بۇگىن اشىق ديالوگ الاڭى ورنادى، بارلىقتارىڭىز پىكىرلەرىڭىزدى ايتتىڭىزدار. وسى رەتتە وبلىس اۋداندارى دا سەلەكتورلىق تارتىپتە وتىرىسقا قوسىلدى. وتىرىستا جەردى ساتۋ جانە شەتەلدىكتەرگە جالعا بەرۋ ماسەلەسى عانا ەمەس، سونىمەن قاتار جەرگە قاتىستى وزگە دە ماسەلەلەر كوتەرىلدى. ياعني، ءبىز جەر ارقىلى ءوسىپ-ءونىپ وتىرمىز، سوندىقتان وزدەرىڭىز كوتەرگەن اۋىل شارۋاشىلىعىن دامىتۋ، الەۋمەتتىك جانە باسقا دا ماسەلەلەرى جەرگە بايلانىستى. جيىن بارىسىندا پىكىرلەرىڭىزدى اشىق ايتقاندارىڭىزعا العىس ايتامىن»، - دەپ توقتالدى ب. ساعىنتايەۆ.

بۇدان بولەك، كوميسسيا ءتوراعاسى اۋىلدىڭ اۋماعىنداعى جايىلىم جەرلەر ماسەلەسىنە توقتالدى.

«ارينە، اۋىلدا تۇرعاننان كەيىن، حالىق مالىن جايعىسى كەلەدى. مال ۇستاعاننان سوڭ، ورىسكە شىعارۋ كەرەك. ەگەر جايىلىم بولماسا، وندا ادامدار مالىن ەتكە جىبەرەدى، ال ودان كەيىن نەمەن كۇن كورەدى؟! سول سەبەپتەن بۇل باعىتتاعى ۇسىنىستار وتە ورىندى. بۇل ماسەلەنى قاراستىرۋ قاجەت»، - دەدى پرەمەر-ءمينيستردىڭ ءبىرىنشى ورىنباسارى.

سونىمەن قاتار وتىرىستان كەيىن تىلشىلەرگە بەرگەن سۇحباتىندا ب. ساعىنتايەۆ وتىرىس بارىسىندا كوتەرىلگەن ماسەلەلەر نازاردان تىس قالمايتىنىن ايتا كەلە، ءوڭىر تۇرعىندارىنىڭ ۇسىنىستارى جۇيەلەنىپ، قاراستىرىلاتىنىن جەتكىزدى.

اۆتور: رۋسلان عابباسوۆ