تانىمال تەلەجۇرگىزۋشى دينا نەگە «جۇلقىنادى»؟
جۇرگىزۋشى ەكراندا ءوزىنىڭ جۇلقىنىپ تۇرعانداي كورىنۋىنىڭ سەبەبىن تىك مىنەزدىلىگىمەن بايلانىستىرادى.
«شىنىمدى ايتسام، ەكرانداعى دينا مەن ومىردەگى دينانىڭ وبرازىندا اسا ءبىر ايىرماشىلىق جوق. ءيا، مەن تىك مىنەزدىمىن. قاي جەردە دە، ءوز وي- پىكىرىمدى اشىق ايتۋعا تىرىسامىن. بەلگىلى ءبىر ماقساتقا جەتەمىن دەسەم، وندا دورەكى ءارى سۋىقپىن. ال، بۇگىن نازىكتىكتى اڭعارىپ وتىرساڭىز، وندا ول انا اتانعاننان كەيىن ازداپ جۇمسارعان شىعارمىن بالكىم. شىنىمدى ايتسام، انا بولۋ ارقىلى مەيىرىم دەگەننىڭ نە ەكەنىن سەزىنە باستاعاندايمىن. اينالامداعىلارعا مەيىرىمدىلىكپەن قاراۋىمنىڭ سىرى وسىندا جاتقان شىعار»، - دەيدى ول.
جۇرگىزۋشى «قازاقتىڭ مەنتاليتەتىنە ساي كەلمەيتىن دۇنيەلەردى كورسەتەدى» دەپ ءجيى سىنايتىندارعا دا ءوز جاۋابىن بەردى.
«بۇل ءبىر قاراعاندا ورىندى كورىنۋى مۇمكىن. ەكىنشى جاعىنان، قانشا جەردەن مويىنداعىمىز كەلمەسە دە، كەيبىر انايىلىقتى دا، دورەكىلىكتى دە جاساپ جاتقان ءوزىمىزدىڭ قاراكوز قازاقتار. مەن وسىنىڭ ءبارىن كورە تۇرا، «مۇنداي نارسە بىزدە جوق» دەپ قالاي عانا قول قۋسىرىپ قاراپ وتىرامىن؟ جالپى ايتقاندا، جۋرناليست دەگەن ءيت سياقتى. قوعامداعى ورىن العان كەز-كەلگەن كەلەڭسىز قۇبىلىستى كورگەندە، «ءۇرىپ» ودان حابار بەرۋى كەرەك. ياعني، جاعدايدىڭ تۇزەلۋىنە ىقپال ەتۋ - ءبىزدىڭ نەگىزگى مىندەتىمىز»، - دەيدى دينا تولەپبەرگەن.
سونىمەن قاتار جۋرناليست قىزمەت بابىمەن سوتقا سۇيرەگەندەر دە تابىلعانىن ايتادى.
«مەن، قازاقستانداعى ەڭ كوپ سوتتاساتىن جۋرناليستەردىڭ ءبىرىمىن (كۇلىپ). كەيدە ەكى اپتا سايىن سوت زالىنا بارۋعا تۋرا كەلەتىن. ءبىراق، ەشبىرىندە جەڭىلىپ كورگەن ەمەسپىن. ويتكەنى مەن ەشقانداي زاڭبۇزۋشىلىق ارەكەتتەرگە بارعان جوقپىن. بۇل تۇرعىدا ارىپتەستەرىمە بۇقارالىق اقپارات قۇرالدارى تۋرالى زاڭدى بەس ساۋساقتاي ءبىلۋدىڭ اسا ماڭىزدى ەكەندىگىن باسا ايتقىم كەلەدى»، - دەيدى ول.
جۋرناليست بۇنداي جاعدايدا جولداسى قىزمەتىنە تەك تۇسىنىستىكپەن قارايتىنىن اتاپ ءوتتى.
«ەگەر دە جولداسىم ماعان: «جۇمىسىڭدى تاستا، ۇيدە وتىر» دەگەن تالاپ قويسا، مەن وعان قارسى كەلمەس ەدىم. ءبىراق مەن ونداي جاندى ومىرلىك سەرىگىم رەتىندە تاڭداماس تا ەدىم. ارينە، جولداسىم مەنىڭ جۇمىسىما تۇسىنىستىك تانىتادى. ويتكەنى، ول مەنىڭ كاسىبىمنىڭ جۇگى جەڭىل ەمەس ەكەندىگىن الدىن الا ءبىلدى. شىنى كەرەك، بالا كۇتىمىنە بايلانىستى ءبىر جىلدان اسا ۋاقىت ۇيدە وتىردىم. سوندا جولداسىم: «دينا، جۇمىسىڭا بارعانىڭ دۇرىس» دەپ ءوزى رۇقساتىن بەردى. سويتسەم، ونىڭ ايتۋىنشا مەن جۇمىس ىستەپ جۇرگەندە، ۇيگە وتە كوڭىلدى ورالادى ەكەنمىن. ومىرىمدە وسىنداي جانىمدى تۇسىنەتىن ەر ازاماتتىڭ كەزدەسكەنى ءۇشىن دە ءوزىمدى باقىتتىمىن دەپ ەسەپتەيمىن»، - دەيدى جۇرگىزۋشى.
سونداي-اق جۋرناليست ەل الدىندا ادەمى، جارقىراپ ءجۇرۋدىڭ دە قۇپياسىن اشتى.
«مەنىڭشە ەڭ باستىسى - ادام سۇلۋ كورىنۋى ءۇشىن ونىڭ جان دۇنيەسى سۇلۋ بولۋى كەرەك. زاتىمىز ايەل ەمەس پە؟! ۇيدە دە، جۇمىستا دا ادەمى قالپىمدا جۇرۋگە تىرىسامىن. بۇل تۇرعىدا، ەڭ ءبىرىنشى دۇرىس تىنىعامىن. بەت كۇتىمىنە ارنايى كوڭىل ءبولۋ - مەنىڭ كۇندەلىكتى داعدىما اينالعان نارسە»، - دەپ ءسوزىن ءتۇيدى دينا تولەپبەرگەن.
«nur.kz»