قىتايلار سولتۇستىك قازاقستان وبلىسىندا جاڭا زاۋىتتىڭ قۇرىلىسىن باستادى

استانا. قازاقپارات - سولتۇستىك قازاقستان وبلىسىندا قىتايلىق «ايتسزيۋ» كومپانياسى مايلى داقىلداردى قايتا وڭدەيتىن بىرلەسكەن كاسىپورىن زاۋىتىنىڭ قۇرىلىسىن باستادى دەپ حابارلايدى «ازاتتىق».

زاۋىت تايىنشا اۋدانىنا قاراستى يليچيەۆكا اۋىلىندا تۇرعىزىلماق. بىرلەسكەن جوباعا قىتايلىق ينۆەستورلار قازىرگە دەيىن 30 ميلليون دوللار قاراجات قۇيعان. جوباعا ءالى 100 ميلليون دوللار كولەمىندە ينۆيستيتسيا قۇيۋ جوسپارلانىپ وتىر. زاۋىت سولتۇستىك قازاقستان وبلىسىنان جىلىنا 300 مىڭ تونناعا دەيىن مايلى داقىلداردى ساتىپ الادى جانە كۇنىنە ءبىر توننا ماي شىعارادى دەپ جوسپارلانعان.

«ايتسزيۋ» كومپانياسىنىڭ پرەزيدەنتى حەي دزيانىڭ سوزىنشە، قازاقستاندا قايتا وڭدەۋ زاۋىتىن سالۋدىڭ مۇمكىندىگى زور.

«ءبىز قازاقستاندىق ءونىمدى ورگانيكالىق تازا ءونىم دەپ بىلەمىز. سوندىقتان ول قىتاي نارىعىندا ۇلكەن سۇرانىسقا يە بولادى. قىتاي جىلىنا 17 ميلليون توننا ماي ونىمدەرىن شەتتەن اكەلەدى. قازاقستاندا قايتا وڭدەۋ زاۋىتىن سالۋ ۇلكەن مۇمكىندىكتەر بەرەدى دەپ ويلايمىز جانە ءبىز قىتايدا ەكسپورتتى ءبىر جونگە كەلتىرەمىز»، - دەدى حەي دزيا.

سولتۇستىك قازاقستان وبلىسىنىڭ اكىمى ەرىك سۇلتانوۆ بۇل جوبا ءساتتى جۇزەگە اسسا كومپانيا باسشىلىعى تاعى جەتى زاۋىت سالۋدى جوسپارلاپ وتىرعانىن ايتادى.