قانات يسلامنىڭ ايتقان اڭگىمەلەرىنەن

استانا. قازاقپارات - «باۋىرلار، ءبىز تاۋەلسىز ەلدە، ءوزىمىزدىڭ جەردە، تىنىشتىقتا ءومىر ءسۇرىپ جاتىرمىز.

سول تىنىشتىقتىڭ قادىرىن بىلەيىكشى، باۋىرلار. مەن امەريكادا جۇرگەندە وسى ەلىمە قايتقانشا اسىعامىن. امەريكا دەگەن ادام تۇراتىن جەر ەمەس. ول جاقتا ادامداردىڭ بۇكىل جاعدايى جاسالىپ قويعان. تەلەديداردىڭ ءبارى شوۋ، ينتەرنەت تەگىن، كرەديت الا بەرەسىڭ. كەرەگىڭنىڭ ءبارى بار، ءبىراق ادامدارى رۋحاني ازعىنداپ كەتكەن. كوزدەرىنىڭ ءار جاعىندا ەشنارسە جوق.

قازىرگى كەزدە بىرەۋلەر: «قازاقستاندا دەموكراتيا جوق» - دەپ ءجۇر عوي. الايدا، ناعىز دەموكراتيا بىزدە. امەريكادا بىزدەگىدەي كەز- كەلگەن ادام ۇيىندە وتىرىپ الىپ پرەزيدەنتىن جامانداپ جازا المايدى. ول جاقتا بارلىق نارسەنى زاڭمەن بايلاپ تاستاعان. كەرەك دەسەڭىز، ءوزىڭىزدىڭ جولداس بالاڭىزدىڭ سابيىنە: «وي قانداي ادەمى بالا» - دەپ ايتا المايسىڭ. ولاي ايتساڭىز ءسىزدى سوتقا بەرۋگە حاقىسى بار. مەن جاتتىعاتىن جەردىڭ جانىندا مەشىت بار. سول مەشىتتىڭ يمامى پالەستينالىق. مەن ودان سۇرايمىن: «سەن نە ىستەپ ءجۇرسىڭ مىنا جاقتا؟ سەنى نە ۇستاپ تۇرعان؟ قايتپايسىڭ با ەلىڭە؟» - دەسەم، «ە، ەگەر ەلىمدە تىنىشتىق بولسا، توبەڭنەن وق جاڭبىرداي جاۋىپ تۇرماسا، مەن مىنا جەردە 1 مينۋتتا تۇرماس ەدىم. ەلىمدە تىنىشتىق بولماي تۇر عوي» - دەپ مۇڭايادى».

سوندىقتان، وسى تىنىشتىقتى باعالايىق باۋىرلار!

«قازاقستاننان ەندى جاقسى سپورتشىلار شىقپاسا قايدام. سەبەبى، بىزدەگىدەي سپورت كەشەندەرى امەريكانىڭ وزىندە كەمدە- كەم. ال، كۋبانىڭ سپورتشىلارى مۇلدە قيىن جاعدايدا. كۋبانىڭ وليمپيادا چەمپيوندارى بىزدە باياعىدا ءمىنىپ تاستاعان جيگۋليلەردى ءمىنىپ جۇرەدى. كەيدە قازاقستانعا كەلگەندە بازاردان سول جيگۋليلەردىڭ زاپچاستتارىن تيەپ الىپ كەتەدى ەلدەرىنە. ول جاقتا وليمپيادادان ۇتىپ كەلگەن چەمپيونعا ءبىر رەتتىك 2-3 مىڭ دوللار عانا سىياقى بەرىلەدى. ولاردا كولىك الۋ تۇگىلى كۇندەلىكتى تاماق تاۋىپ جەۋىڭنىڭ ءوزى ۇلكەن پروبلەما.

 باۋىرلار، تاۋەلسىز ەلىڭنىڭ بارى قانداي باقىت ەكەنىن بىلەسىز بە؟ بىردە ۇيعىر ۇستازىممەن الماتىنىڭ كوشەلەرىندە كەلە جاتقانىمدا، ۇستازىم ايتتى: «اي، قازاقتار، تاۋەلسىزدىكتىڭ قادىرىن تۇسىنبەي ءجۇر-اۋ. ەگەر مەنىڭ ءوزىمنىڭ تاۋەلسىز ەلىم، جەرىم بولسا، سول ەلىمنىڭ كوشەسىن سىپىرۋشى بولىپ ىستەر ەدىم. مەملەكەتتەن ءبىر شۇبەرەك سۇراماستان، ۇستىمدەگى كويلەگىممەن سۇرتەر ەدىم اسفالتتى». بىردە سول ۇستازىممەن تۇركىستان قالاسىنىڭ ۆوكزالىنا تۇستىك. ۆوكزالدا ەسكى كولىگىنەن اياعىن شىعارىپ قويىپ، ءبىر تاكسيست: «قاي جەرگە باراسىڭدار، جەتكىزىپ سالايىن» - دەپ سۇرادى. سوندا ۇيعىر ۇستازىم: «ەح، شىركىن، ەگەر مەنىڭ ءوزىمنىڭ ەلىم بولسا، سول ەلىمدە ەسەك اربامەن تاكسي بولىپ ادام تاسىسام ارمانىم بولماس ەدى» - دەپ كۇرسىندى.

 باۋىرلار، بىزدە بارلىعى بار. ءار وبلىسقا بارعان سايىن، وعان كوزىم جەتىپ جاتىر. 25 جىلدىڭ ىشىندە بىزدەردىڭ ءار وبلىسىمىز امەريكانىڭ 1 شتاتى سياقتى دامىپ كەلە جاتىر. امەريكالىقتار مەنەن سۇرايدى: «سەندەر ايدالادا ءومىر سۇرەسىڭدەر ما؟ تاماق، سۋ دەگەن بار ما سەندەردىڭ ەلدەرىڭدە؟» - دەپ. سوندا مەن تەلەفونىمداعى استانانىڭ، الماتىنىڭ جانە باسقا دا وبلىستاردىڭ سۋرەتتەرىن كورسەتىپ ماقتانامىن، سوندا ولار: «شىنىمەن وسىنداي ما نە؟» - دەپ تاڭ قالادى.

باۋىرلار، كىتاپ كوپ وقىڭدار. سپورتتا بولسىن، باسقا سالادا بولسىن، ەڭ ءبىرىنشى ءبىلىم كەرەك. ءبىلىمىڭ بولماسا، ەش جەردە جارقىراپ شىقپايسىڭ. ەڭ العاش سپورتزالعا بارعاندا ۇستازىمىز بارلىق بالالاردى جيناپ الىپ ايتقان: «ماعان سەندەردىڭ چەمپيون بولعاندارىڭ كەرەك ەمەس، ەڭ ءبىرىنشى كەزەكتە ادام بولىڭدار! ەرتەڭ چەمپيون بولعاندا ادام تانىماي، تاكاپپارلانىپ كەتسەڭ، نەمەسە جەڭىلگەن كەزىڭدە سىنىپ قالىپ، تومەن ءتۇسىپ كەتسەڭ، ەڭ قيىنى سول بولادى. سوندىقتان، ءبىرىنشى كەزەكتە ادام بولىڭدار!» - دەگەن ءسوزى ءالى جادىمدا».

اعايىن، مەن قاناتتىڭ بۇل سوزدەرىن نەگە جازىپ وتىرمىن. قازاقتا: «التىننىڭ قولدا باردا قادىرى جوق» - دەگەن ءسوز بار. ءبىزدىڭ تاۋەلسىزدىگىمىز، ەلىمىزدىڭ تىنىشتىعى - بۇل ەڭ ۇلكەن بايلىعىمىز. سول بايلىقتىڭ قادىرىن بىلەيىكشى. ءبىز سىرتقا شىقپاعاننان كەيىن تەك ءبىزدىڭ عانا جاعدايىمىز جامان، بىزدە عانا كەدەيشىلىك بار سەكىلدەنىپ كورىنەدى.

الايدا، ءبىز قازىر تويىپ سەكىرىپ جاتقان سياقتىمىز. بىزدە ءبارى بار، تەك ءبىر- بىرىمىزگە دەگەن مەيىرىمىز، ادامشىلىعىمىز ازايىپ بارا جاتقان سىڭايلى. ەلىمىز تىنىش، حالقىمىز اۋىزبىرلىكتە بولعاي!

عازيز قۇلكەيەۆتىڭ facebook-تەگى جازباسىنان