اۋىل شارۋاشىلىعى ءمينيسترى قازاقستان مەن قىتاي اراسىندا جەردى جالعا بەرۋ تۋرالى كەلىسىمگە قول قويىلعانىن جوققا شىعاردى
بۇگىن جەر رەفورماسى جونىندەگى كوميسسيانىڭ وتىرىسىندا بايانداما جاساعان اۋىل شارۋاشىلىعى ءمينيسترى اسقار مىرزاحمەتوۆ وسىلاي مالىمدەدى.
وتىرىس بارىسىندا كوميسسيا مۇشەسى مۇحتار تايجان «قىتايعا جەردى جالعا بەرۋگە قاتىستى كەلىسىمشارتتارعا قول قويىلعان» دەگەن ماسەلەگە مينيستردەن تۇسىنىك بەرۋدى سۇراعان بولاتىن.
«قىتايدىڭ اۋىل شارۋاشىلىعى مينيسترلىگىنە قارايتىن كارانتين جونىندەگى باس باسقارما بار. ونىڭ مارتەبەسى مينيسترلىكپەن بىردەي. ءبىز سول باسقارمامەن ارنايى جۇمىس جوسپارى تۋرالى قول قويعانىمىز راس. ول مينيسترلىكتىڭ تىكەلەي جۇمىسى. وندا نەگىزىنەن قازاقستان مەن قىتاي اراسىنداعى ساۋدا- ساتتىقتى دامىتۋ. وزدەرىڭىز بىلەسىزدەر، قىتاي الەمدەگى ۇلكەن ەكونوميكانىڭ ءبىرى. ال وسى نارىقپەن شەكارالاس بولا تۇرا، ونى قانشالىقتى ءتيىمدى پايدالانىپ وتىرمىز؟ وسى مۇمكىندىكتى پايدالانۋعا ءبىز جاقىنداي تۇستىك. وندا نەگىزىنەن شەكتەۋلەردى الىپ تاستاۋ تۋرالى ماسەلەلەر كوتەرىلگەن بولاتىن»، دەدى ا. مىرزاحمەتوۆ.
ونىڭ ايتۋىنشا، كەلىسىمشارت نەگىزىنەن قازاقستاندىق اۋىل شارۋاشىلىعى تاۋارىن قىتايعا جەتكىزۋگە باعىتتالعان جەڭىلدىكتەردى قامتيدى. وسىعان بايلانىستى قىتاي تاراپىنان ارنايى كوميسسيا دا كەلگەن ەكەن.
«جالپى قىتاي مال ونىمدەرىنە، ورگانيكالىق ونىمدەردى ساتىپ الۋعا قىزىعادى. ودان نەگە باس تارتۋعا ءتيىسپىز؟ كاسىپورىندارىمىزدى ارالادى، وزدەرىنىڭ نارىعىنا قانشالىقتى ساتۋعا بولاتىنىن تەكسەردى. سوسىن وسى شارالاردى رەتتەۋ ءۇشىن ءبىز قىتايمەن كەلىسىمگە كەلىپ وتىرمىز، الايدا وندا جەرگە، جەردى وڭدەۋگە قاتىستى ەشقانداي دا باپتار قامتىلماعان»، دەدى ا. مىرزاحمەتوۆ.
بۇل رەتتە مينيستر بۇعان دەيىنگى قول قويىلعان كەلىسىمشارتتاردىڭ بارلىعى دا جالپى ساۋدا- ساتتىق باعىتىندا ەكەنىن اتاپ ءوتتى. «قول قويىلعان مەموراندۋمداردىڭ بارلىعى حالىقارالىق كەلىسىمشارت ەمەس. ونىڭ قۇقىقتىق ستاتۋسى جەرگىلىكتى زاڭ ارقىلى عانا راسىمدەلەدى. ياعني، قول قويىلعان قۇجاتتار بويىنشا جەرگە قاتىستى ەشقانداي ماسەلە تۋىندامايدى»، دەدى ول.
اۆتور: قانات مامەتقازى ۇلى