ماجىلىستە «جايىلىمدار تۋرالى» زاڭ جوباسى تانىستىرىلدى

استانا. قازاقپارات - بۇگىن پارلامەنت ماجىلىسىندە «جايىلىمدار تۋرالى» زاڭ جوباسىنىڭ تانىستىرىلىمى بولىپ ءوتتى.

زاڭ جوباسى مەملەكەت باسشىسى ايقىنداعىن «100 ناقتى قادام» ۇلت جوسپارىنىڭ 35-، 97- قادامدارىن ىسكە اسىرۋ جانە «قازاقستان-2050» ستراتەگياسىندا جۇكتەلگەن مىندەتتەردى ورىنداۋ ماقساتىندا ازىرلەنگەن.

قۇجات ەلىمىزدەگى جايىلىمدار ينفراقۇرىلىمىن جاقسارتۋعا، جايىلىم جەرلەردىڭ توزۋىن بولدىرماۋعا، ولاردىڭ قورشاعان ورتا ەكوجۇيەسىندەگى ەكولوگيالىق تۇتاستىعىن ساقتاۋعا باعىتتالادى. بۇدان بولەك، قۇجاتتا ەكولوگيالىق تازا مال ونىمدەرىن ءوندىرۋدى ارتتىرۋ ماسەلەلەرى قاراستىرىلىپ وتىر.

«ەلىمىز كەڭ بايتاق، سولاي بولا تۇرا اۋىلداعىلار مال جايىلىمىنان تاپشىلىق كورىپ وتىر. وسىعان بايلانىستى سۇراق تۋادى: بۇگىنگى كۇنى جايىلىمدار قالاي پايدالانىلىپ جاتىر؟ قازاقستاندا جىل سايىن شامامەن 11 ميلليون مال باسى جايىلىمداردا جايىلادى، ال ءبىر مال باسىنىڭ تاۋلىكتىك تۇتىنۋى 35 كەلى ءشوپتى قۇرايدى. ياعني، ءبىر جىلعا ءبىر مال ءۇشىن 6,3 توننا ءشوپ كەرەك. الايدا، ءبىزدىڭ كورسەتكىشىمىز 4,6 توننادان اسپايدى. وسىلايشا، ءبىر مال ءۇشىن شوپكە تاپشىلىق 30 پايىزدى قۇرايدى»، - دەدى زاڭ جوباسى بويىنشا بايانداعان دەپۋتات جەكسەنباي دۇيسەبايەۆ.

ونىڭ سوزىنە قاراعاندا، ەلىمىزدە اۋىل شارۋاشىلىعى ماقساتىنداعى جەرلەر 220 ميلليون گەكتار بولسا، ونىڭ 187 ميلليون گەكتارىن جايىلىم جەرلەرى قۇرايدى.

اۆتور: قانات مامەتقازى ۇلى