جەر قاتىناستارىندا جەكە مەنشىك قاعيداتتاردىڭ ساقتالۋى ماڭىزدى - ا. پەرۋاشەۆ

استانا. قازاقپارات - جەر قاتىناستارىندا جەكە مەنشىك قاعيداتتارىنىڭ ساقتالۋى ماڭىزدى.

بۇگىن استاناداعى ۇلتتىق كىتاپحانادا وتكەن «قازاقستان-2050» جالپى ۇلتتىق كواليتسياسىنىڭ وتىرىسىندا «اق جول» پارتياسىنىڭ ءتوراعاسى، ءماجىلىس دەپۋتاتى ازات پەرۋاشەۆ وسىلاي مالىمدەدى.

«جەر ماسەلەسى، ونىڭ تاعدىرى كىم-كىم ءۇشىن دە اسا ماڭىزدى. جەردىڭ ەكونوميكالىق، ساياسي-الەۋمەتتىك، ەكولوگيالىق قىرلارى بارشىلىق. قوعامدا جەر ماسەلەسى بويىنشا قىزۋ پىكىر الماسۋلار وتۋدە. جالپى العاندا جەر تاعدىرىنا بۇكىل ەلىمىزدىڭ، حالقىمىزدىڭ، تاۋەلسىزدىگىمىزدىڭ تاعدىرى بايلانىستى. سوندىقتان دا، «اق جول» پارتياسى جەر كودەكسىنە ەنگىزىلگەن وزگەرىستەرگە موراتوري تۋرالى ەلباسىنىڭ شەشىمىن تولىق قولدايدى»، - دەدى ا. پەرۋاشەۆ.

ونىڭ ايتۋىنشا، كەز كەلگەن كاسىپكەر ءۇشىن جەردى كەلەشەكتە جەكە مەنشىككە الۋ - ءوز ءىسىنىڭ تۇراقتىلىعىن، بولاشاققا سەنىمدىلىكتى قامتاماسىز ەتۋ مۇمكىندىگىن بىلدىرەدى.

«جەر ءۇشىن وعان شارۋاقور، ونىڭ قۇنارىن ارتتىرۋعا مۇددەلى، ونى جىرتقىشتىق پايدالانۋدان قورعايتىن يەنىڭ بولۋى دا ماڭىزدى. بۇل رەتتە جەكە مەنشىك نارىقتىق ەكونوميكانىڭ نەگىزى ەكەنىن ەسكەرە كەلە، بيزنەس-قاۋىمداستىق مۇددەسىنە جۇمىس ىستەيتىن «اق جول» پارتياسى جەر قاتىناستارىنداعى جەكە مەنشىك قاعيداتتارىن جۇزەگە اسىرۋدى قولدايدى. سونىمەن قاتار، رەفورما جولىن تاڭداعاننان سوڭ ءبىر اياقتى نارىقتىق ەكونوميكاعا وتكىزىپ، ەكىنشى اياقپەن سوتسياليزمدە نەمەسە كونە داستۇردە قالىپ قويۋ ەش قيسىنعا كەلمەيدى»، - دەدى ا. پەرۋاشەۆ.

بۇدان بولەك، دەپۋتات جەر رەفورماسىندا قوردالانعان ماسەلەلەردىڭ ءالى شەشىمىن تاپپاي وتىرعانىن ايتا كەلە، ونىڭ ءبىرقاتارىنا توقتالىپ ءوتتى.

«تۇتاستاي العاندا قازاقستان بيزنەسى جەرگە قازاقستان ازاماتتارىنىڭ يەلىك ەتۋ مۇمكىندىگىنە قاعيداتتى تۇردە قولداۋ ءبىلدىرىپ كەلەدى. دەگەنمەن، بۇنى ءبىز مىندەتتى ەمەس، مۇمكىن بولاتىن ماسەلە رەتىندە قاراستىرۋىمىز كەرەك، ياعني جەردى جەكە مەنشىككە قالاي بولسا دا ۇلەستىرىپ بەرە بەرۋگە ەش بولمايدى. بۇل رەتتە اشىقتىق پەن ادىلدىكتى قامتاماسىز ەتۋ اسا وزەكتى، مەنشىك نىسانىن اسىرا سىلتەۋشىلىكتەن دە، تۇراقسىزدىقتان دا قورعاۋعا ءتيىسپىز. جەردى ۇلەستىرگەندە ونىڭ ءبىر عانا قولعا شوعىرلانعانىن بولدىرمايتىنداي ليميت تە كەرەك. جەردى ءتىپتى ءبىر اۋدان توڭىرەگىندە مونوپولياعا اينالدىرۋدى بولدىرمايتىن زاڭنامالىق نورمالار قاجەت»، - دەدى ا. پەرۋاشەۆ.

اۆتور: قانات مامەتقازى ۇلى