دەنساۋلىق: ۇزاق وتىرۋدىڭ زيانى قانداي؟

نۇر- سۇلتان. قازاقپارات - قازىرگى تاڭدا كوپشىلىگىمىز جۇمىسىمىزدى وفيستە، كومپيۋتەردىڭ الدىندا وتىرىپ اتقارامىز.

تەحنيكانىڭ دامۋى دا ادامنىڭ از قيمىلداپ (اسىرەسە قالا تۇرعىندارى)، تەلەۆيزور مەن تەلەفونعا ءجيى ۇڭىلۋگە مۇمكىندىك بەردى.

ال ۇزاق وتىرۋدىڭ دەنساۋلىعىڭىزعا اسا زيان ەكەنىن بىلەسىز بە؟ وتىرعاندا اعزامىز قانداي وزگەرىستەرگە ۇشىرايدى؟

ادام وتىرا سالىسىمەن بۇلشىق ەتتەردىڭ جۇمىسى باسەڭدەپ، كالوريانى جويۋدىڭ جىلدامدىعى مينۋتىنا 1 كيلوكالورياعا دەيىن تومەندەيدى. 3 ساعاتتىق وتىرىستان كەيىن قانتامىرلار كىشىرەيىپ، قان اينالىمى ناشارلايدى. 24 ساعات بويى وتىرساڭىز، ينسۋليننىڭ گليۋكوزانى قارماۋ قاسيەتى 40 پايىزعا تومەندەيدى. سول سەبەپتى ديابەتتىڭ 2- ءتۇرىنىڭ پايدا بولۋ قاۋپى تۋىندايدى. 2 اپتا بويى كۇن سايىن 6 ساعاتتان وتىرساڭىز، اعزاداعى حولەستەرين مولشەرى ارتىپ، ارتىق سالماق قوسۋىڭىزعا سەبەپ بولادى. مايدى ىدىراتۋ فەرمەنتتەرىنىڭ جۇمىسى ناشارلايدى، دەپ جازادى asylsoz.kz.

ادام قيمىلداعاندا ميدى قانمەن، وتتەگىمەن، كوڭىل كۇيگە جاۋاپتى گورموندارمەن قامتاماسىز ەتەدى. ال ۇزاق ۋاقىت قيمىلسىز وتىرۋ ميدىڭ جۇمىس ىستەۋ بەلسەندىلىگىن تومەندەتەدى. ۇزاق وتىرۋ سونداي-اق، جۇرەك-قانتامىرلارى اۋرۋلارىنىڭ، پروستاتا، ومىراۋ بەزى قاتەرلى ىسىگى اۋرۋلارىنىڭ پايدا بولۋ قاۋپىن ارتتىرادى.

سوندىقتان دارىگەرلەر كۇن سايىن تەلەديدار الدىندا تاپجىلماي وتىرۋ ءوز قولىمەن دەنساۋلىعىڭىزعا زيان كەلتىرۋ ەكەندىگىن ايتادى. ال وفيستە جۇمىس ىستەيتىندەرگە ءار 1 ساعات سايىن 5-10 مينۋتتىق ءۇزىلىس جاساپ جاتتىعۋلار جاساپ تۇرۋعا، تۇسكى ۇزىلىستە كەم دەگەندە 30 مينۋت تازا اۋادا جۇرۋگە، جۇمىستان سوڭ تاعى تەلەديدار الدىنا جايعاسىپ «دەمالۋعا» ەمەس، كوبىرەك قيمىلداۋعا كەڭەس بەرەدى.