جۇمىس توپتارى ماسەلەنى ءبىر جۇيەگە كەلتىرىپ، ۇسىنىستاردى تالقىعا شىعارادى - ب. ساعىنتايەۆ
بۇل تۋرالى بۇگىن جەر رەفورماسى جونىندەگى رەسپۋبليكالىق كوميسسيانىڭ وتىرىسىنان كەيىن پرەمەر- ءمينيستردىڭ ءبىرىنشى ورىنباسارى باقىتجان ساعىنتايەۆ ءمالىم ەتتى.
«العاشقى وتىرىسپەن سالىستىرعاندا، بۇگىنگى ەكىنشى وتىرىستا جۇيەلى تۇردە جۇمىستى باستادىق. ويكەنى، وتكەن جولى نەگىزىنەن ءاربىر كوميسسيا مۇشەسى ءوزىنىڭ پىكىرىن ايتقىسى كەلدى جانە وسى مۇمكىندىك بارشاسىنا بەرىلدى. بۇگىن دە پىكىرلەر كوپ بولدى، 38 ادام ويىمەن ءبولىستى. ەكى ماسەلەگە ءمان بەرىلدى: ءبىرىنشىسى - جەر تىپتەن ساتىلماسىن، ال ەكىنشىسى - جەر قانداي تارتىپپەن ساتىلادى. وسى رەتتە ەنگىزىلەتىن شەكتەۋلەر، شەكارانىڭ توڭىرەگىندەگى جانە اۋىل- ايماقتىڭ ماڭىنداعى جەرلەر، الدىندا بەرىلگەن جەرلەر ماسەلەسى، بەرىلەتىن جەردىڭ كولەمى، جەردى تەگىن بەرۋ جانە باسقا دا باعىتتاردا ءتۇرلى ۇسىنىستار ايتىلدى. بۇنىڭ بارلىعىن ءبىر جۇيەگە كەلتىرۋ ءۇشىن بۇگىن 4 جۇمىس توبى قۇرىلدى. وندا كوميسسيا مۇشەلەرى اراسىنان ۇسىنىلعان ازاماتتار جەتەكشى بولىپ بەكىتىلدى»، - دەپ توقتالدى ب. ساعىنتايەۆ.
بۇل تۇرعىدا پرەمەر- ءمينيستردىڭ ءبىرىنشى ورىنباسارى اتالعان جۇمىس توپتارى كەلەسى سەنبىگە دەيىن ءبىر جۇيەگە كەلتىرىپ، ايتىلعان ۇسىنىستاردىڭ بارلىعىن تالقىعا شىعاراتىن بولادى.
«بۇگىنگى تالقىلاۋ بارىسىندا كوميسسيانىڭ بارلىق مۇشەلەرى سابىرلى ءارى پاراساتتى تۇردە پىكىر الماستى. كوميسسيا دا ەندى جۇيەلى جۇمىستارعا كوشىپ جاتىر»، - دەدى ول.
بۇدان بۇرىن حابارلانعانداي، جەر رەفورماسى جونىندەگى كوميسسيانىڭ ەكونوميكا بويىنشا جۇمىس توبىنا اقىلبەك كۇرىشبايەۆ، قۇقىقتىق باعىتى بويىنشا جۇمىس توبىنا مۇحتار تايجان، اقپاراتتىق توپقا مۇرات ابەنوۆ، شەشىمدەرىنىڭ ورىندالۋىن قاداعالاۋ جونىندەگى جۇمىس توبىنا دوس كوشىم جەتەكشىلىك ەتەدى.
اۆتور: رۋسلان عابباسوۆ