جەرگە جەكە مەنشىك قازاقتىڭ اتا- بابا داستۇرىنەن ۇزىلمەي كەلە جاتىر - م. قۇل- مۇحاممەد
«جەردى جەكە مەنشىككە بەرۋ كەرەك پە، جوق پا؟ جالپى كونستيتۋتسيانىڭ 6-بابىندا جەر جەكە مەنشىككە دە، مەملەكەت مەنشىگىندە دە بولۋى كەرەك دەپ جازىلعان. قانشا كوميسسيا قۇرساق تا، قانشا قاۋلى قابىلداساق تا وندا قابىلدانعان شەشىم كونستيتۋتسياعا قايشى كەلەتىن بولسا، ونداي زاڭنىڭ ەشقانداي دا كۇشى بولمايدى. ياعني، وسىعان بايلانىستى جەر جەكە مەنشىكتە دە بولۋى كەرەك»، - دەدى م. قۇل- مۇحاممەد.
بۇدان بولەك، ول باسپا سوزدە قازاقستاندا ەش ۋاقىتتا جەر جەكە مەنشىكتە بولماعان دەگەن ۇشقارى پىكىر جۇرگەنىنە نازار اۋدارىپ، سوعان قاتىستى ۇستانىمىن ءبلدىردى.
«ەگەر الەمدە جەردىڭ مەنشىگى ءبىر حالىقتا بولعان بولسا، ول قازاق حالقىندا عانا بولاتىن ەدى. قازاقتىڭ جايلاۋى دا، قىستاۋى دا، كەرەك دەسەڭىز كوشىپ- قونعانداعى مارشرۋتى دا بەلگىلى بولعان. كوشىپ- قونۋدا باسقا رۋدىڭ جەرىنە ءتۇسىپ كەتسە، رۋ ارالىق قاقتىعىستار ورىن العان. سوندىقتان دا، جەرگە جەكە مەنشىك قازاقتىڭ اتا- بابا داستۇرىندە بار»، - دەدى م. قۇل- مۇحاممەد.
سونىمەن قاتار، كوميسسيا مۇشەسى جەردى جەكە مەنشىككە بەرۋدەگى ەسكەرىلەتىن ماسەلەلەرگە دە توقتالىپ ءوتتى. ونىڭ ايتۋىنشا، جەر رەفورماسىنا قاتىستى قابىلدانعان زاڭدا كەمشىلىكتەر بارشىلىق. «ماسەلەن، وندا جەردى قازاقستان ازاماتتارىنا جەكە مەنشىككە ساتۋعا بولادى دەيدى دە، ولارعا جالعا بەرۋگە بولمايدى دەپ جازىلعان. ال بۇعان دەيىنگى كودەكستە قازاقستان ازاماتتارىنا جالعا دا بەرىلەتىن، ساتۋعا دا بولاتىن. سوندا قالاي؟ شەتەلدىككە جالعا بەرۋگە بولادى، ساتۋعا بولمايدى، قازاقستاننىڭ ازاماتىنا ساتۋعا بولادى، جالعا بەرۋگە بولمايدى. بۇل دۇرىس ەمەس، قازاقستاندىقتارعا جالعا دا، ساتۋعا دا بەرىلۋى كەرەك. ويتكەنى، ءبىر ازاماتىمىزدىڭ جەردى ساتىپ الۋعا اقشاسى بار، ەكىنشىسىندە ونداي قاراجات جوق»، - دەدى ول.
اۆتور: قانات مامەتقازى ۇلى