جەردىڭ قولدان قولعا ساتىلىپ كەتپەۋىن بولدىرماۋ كەرەك - دەپۋتات ج. دۇيسەبايەۆ

استانا. قازاقپارات - اۋىل شارۋاشىلىعى جەرلەرىنىڭ ءتيىمدى پايدالانۋىنا جانە ونىڭ قولدان قولعا ساتىلىپ كەتپەۋىن بولدىرماۋ كەرەك، دەپ ەسەپتەيدى ق ر پارلامەنتى ءماجىلىسىنىڭ دەپۋتاتى جەكسەنباي دۇيسەبايەۆ.

«اۋىل شارۋاشىلىعىنىڭ باستى كاپيتالى، ارينە ول - جەر. ءبىزدىڭ ەلىمىز نارىقتىق ەكونوميكاعا كوشكەننەن كەيىن، ول كاپيتال ەندى جۇمىس جاساۋى كەرەك. سوندىقتان دا مۇندا باسەكەلەستىك تە، جەكەمەنشىك تە بولۋى قاجەت، جالعا بەرىلۋى دە كەرەك. كىم قاي جولمەن بارعىسى كەلەدى، سول جولدى تاڭداپ، ءوز ءىسىن باستاۋ قاجەت. مىسالعا، ساتىپ الام دەگەن ادام زاڭعا سايكەس شەكتەۋلەرمەن السىن، قۇنارلىعىن كوبەيتسىن، ءونىمىن السىن، ەلگە دە، ۇكىمەتكە دە، وزىنە دە پايداسىن اكەلسىن»، - دەدى ول بۇگىن جەر رەفورماسى بويىنشا قۇرىلعان كوميسسيانىڭ ەكىنشى وتىرىسىندا.

دەپۋتات دەگەنمەن، ول جەرلەردىڭ ءتيىمدى ءارى ماقساتتى پايدالانۋىنا دا ۇلكەن ءمان بەرۋ قاجەتتىگىن اتاپ ءوتتى.

«ەكىنشى ماسەلە، حالقىمىزدىڭ دەڭگەيى بىردەي ەمەس، سوندىقتان ساتىپ المايتىندارعا، ارينە جالعا بەرۋدى دە قاراستىرۋ كەرەك سياقتى. وسى جاعىن تولىعىراق قاراپ، ەكى جاعىن دا زەرتتەيىك. الدا ۋاقىت بار عوي بىزدە ءالى.

كوميسسيامىز قۇرىلدى، زاڭدى تۇردە، جان- جاقتى، اسىقپاي قاراپ، تولىقتىرىپ، ونىڭ بارلىعىن جەتكىزۋگە بولادى. ءبىراق تا مەنىڭ ءبىر ويىم: ون سوتىق جەر بەرىلدى عوي بىزدە، ول دۇرىس بولدى، ءبىراق كەيىن ءبىر قولدان ەكىنشى قولعا ساتىلىپ كەتتى. جەر بار، ءبىراق سالىنعان ءۇي جوق. سول سياقتى اۋىل شارۋاشىلىق جەرلەرى مەنشىككە وتسە، ونىڭ دا وسىلاي قولدان قولعا ساتىلىپ كەتپەۋىن بولدىرماۋ كەرەك»، - دەدى دەپۋتات.

- ەرتەڭ قولدان قولعا كەتىپ، جەر «تاقتايداي» بولىپ جاتادى. بۇل - ەشقانداي ناتيجە بەرمەيتىن دۇنيە. سوندىقتان، وسى جاعىن تەرەڭىرەك قاراۋ كەرەك دەپ ويلايمىن. مۇمكىن، شەكتەۋ ەنگىزىلەدى مە، ماسەلەن، ون جىلعا دەيىن ساتپاۋ كەرەك دەگەن... ەگەر ول ناتيجە شىعارىپ العان جەردىڭ قۇنارلىعىن ارتتىرىپ، ون بەس جىلدا ناتيجە شىعارىپ جاتسا، وعان ساتۋعا بولادى دەگەن سياقتى. ال ەگەر ول جەردەن تەك قانا سول العان قۇنارلىعىن عانا قالدىرىپ، ەشقانداي جاڭاشىلدىق اكەلمەسە، وعان ساتۋعا نە ءۇشىن جول بەرۋ كەرەك دەگەن ماسەلەلەر تۋىندايدى»، - دەدى دەپۋتات.

ايتا كەتەيىك، بۇگىن استانادا جەر رەفورماسى بويىنشا كوميسسيانىڭ ەكىنشى وتىرىسى ءوتىپ جاتىر. كوميسسياعا ق ر پرەمەر-ءمينيسترىنىڭ ءبىرىنشى ورىنباسارى باقىتجان ساعىنتايەۆ ءتوراعالىق ەتۋدە.

اۆتور: جاسۇلان جولدىبايەۆ