م. تايجان ق ر باس پروكۋراتۋراسىنان زاڭسىز ميتينگتى ۇيىمداستىرۋشىلاردى مەرزىمىنەن بۇرىن بوساتۋدى سۇرادى
«مەن ولاردىڭ رۇقسات ەتىلمەگەن ميتينگكە شاقىرعانىن تۇسىنەمىن. دەگەنمەن، ولار ونى ءالى دە جاساعان جوق. ۇستاۋ ءتۇن ىشىندە جۇرگىزىلدى. ءسىز پوليتسيا كۇش قولدانعان جوق دەيسىز، قولداندى، ۆيدەوسى بار. اتا-انالارىنىڭ ۇيىنە ءتىنتۋ جۇرگىزدى. وسىنى تۇسىنەسىز بە؟ قازىر ءبىزدىڭ بارلىعىمىز دا بارىنشا اباي بولۋعا، ۇستامدى بولۋعا ءتيىسپىز. مەملەكەتكە ۇيىمداسقان ينستيتۋت رەتىندە ەموتسيونالدى ادامدارعا قاراعاندا زور جاۋاپكەرشىلىك جۇكتەلەدى»، - دەدى ول ق ر باس پروكۋرورىنىڭ ورىنباسارى اندرەي كراۆچەنكوعا قاراتا.
م. تايجان باس پروكۋراتۋرادان تۇتقىنعا الىنعاندارعا قاتىستى سوت شەشىمىن قايتا قاراۋعا جانە ولاردى مەرزىمىنەن بۇرىن بوساتۋعا ىقپال ەتۋىن ءوتىندى.
ايتا كەتەرلىگى، وتىرىس بارىسىندا ا. كراۆچەنكو زاڭسىز ميتينگكە شاقىرعانى ءۇشىن شامامەن 40 بەلسەندى تۇتقىنعا الىنعانىن ءمالىم ەتكەن بولاتىن.
اۆتور: مارلان جيەمباي