ا. كۇرىشبايەۆ جەر رەفورماسى جونىندەگى كوميسسيانىڭ ەكونوميكا بويىنشا جۇمىس توبىنىڭ جەتەكشىسى بولىپ سايلاندى
بۇگىن ق ر پرەمەر-ءمينيسترىنىڭ ءبىرىنشى ورىنباسارى، جەر رەفورماسى بويىنشا رەسپۋبليكالىق كوميسسيا ءتوراعاسى باقىتجان ساعىنتايەۆتىڭ جەتەكشىلىگىمەن كوميسسيانىڭ ەكىنشى وتىرىسىندا وسىنداي شەشىم قابىلداندى.
ايتا كەتەرلىگى، وتكەن ءبىرىنشى وتىرىستا كوميسسيا ءارتۇرلى باعىتتا جۇمىس توپتارىن قۇرۋ تۋرالى ماسەلە كوتەرگەن بولاتىن. وسى ۇسىنىس بويىنشا ەكونوميكالىق، قۇقىقتىق، اقپاراتتىق جانە ۇيىمداستىرۋشىلىق باعىتىنداعى ءتورت توپ قۇرىلاتىنى بەلگىلى ەدى.
«ۇيىمداستىرۋشىلىق دەگەنىمىز جەردى بەرۋ راسىمدەرىن، ونىڭ ىشىندە وكىلەتتى مەملەكەتتىك ورگاندار قىزمەتىنىڭ زاڭدىلىعىن، اشىقتىعىن قامتاماسىز ەتۋدەگى ۇسىنىستار بويىنشا شەشىمدەر قابىلدايدى. وسى جۇمىس توبىن قۇرۋ ماسەلەسىندە بارلىعى كەلىسىلدى. ەكونوميكالىق توپقا -26 ادام، قۇقىقتىق توپقا - 14 ادام، ۇيىمداستىرۋشىلىق توپقا -16 ادام، اقپاراتتىق توپ ءتۇسىندىرۋ توبىنا 16 ادام جازىلدى. بۇل كوميسسيا مۇشەلەرىنىڭ تىكەلەي ۇسىنىستارى نەگىزىندە دايىندالدى. ەندى جۇمىس توبىنىڭ جەتەكشىلەرىن سايلاۋىمىز كەرەك»، - دەدى ب. ساعىنتايەۆ.
تالقىلاۋ بارىسىندا ەكونوميكالىق توبىنا وراز جاندوسوۆتىڭ، اقىلبەك كۇرىشبايەۆتىڭ كانديداتۋراسى ۇسىنىلعان بولاتىن. ال تالقىلاۋ بارىسىندا وراز جاندوسوۆ ءوز كانديداتۋراسىن قايتارىپ الدى: «باسقا جۇمىستارىم دا كوپ ەدى»، - دەدى ول.
«ا. كۇرىشبايەۆ اۋىل شارۋاشىلىعى مينيسترلىگىن باسقارعان، عالىم، جەر شارۋاشىلىعىن تەرەڭ بىلەدى، دوكتورلىق قورعاعان. قازىر قازاق اگرارلىق ۋنيۆەرسيتەتىنىڭ رەكتورى»، - دەدى سەناتور قۋانىش ايتاحانوۆ. جيىنعا قاتىسۋشىلاردىڭ باسىم كوپشىلىگى وسى كانديداتۋرانى قولدادى.
اۆتور: قانات مامەتقازى ۇلى