قازاقستاندىق كاسىپقوي بوكسشى قانات يسلام الماتىعا ورالدى - كەسكىن
وڭتۇستىك استانانىڭ حالىقارالىق اۋەجايىندا قاناتتى قارسى الۋ ءۇشىن 200 گە جۋىق ادام جينالدى. ولاردىڭ اراسىندا رەسپۋبليكالىق سپورت كوللەدجىنىڭ ديرەكتورى امالبەك تشانوۆ، قازاقستاننىڭ بوكس فەدەراتسياسىنىڭ ۆيتسە- پرەزيدەنتى، بەلگىلى مەسەنات باۋىرجان وسپانوۆ، بوكستان وليمپيادا چەمپيونى ەرماحان ىبىرايىموۆ جانە باسقا دا بەلگىلى تۇلعالار بولدى.
قانات يسلام vip زالدان كورىنىسىمەن تاعاتسىزدانا كۇتىپ تۇرعان ءدۇيىم جۇرت ونى: «قانات، قانات!»، «قانات جاساسىن!»، «قانات - قازاقتىڭ باتىرى!» دەگەن سەكىلدى ۇراندار ايتىپ قارسى الدى. كوك بايراقتى كوتەرگەن رەسپۋبليكالىق سپورت كوللەدجىنىڭ ءبىر توپ ستۋدەنتتەرى دە «قانات، قانات!» دەپ ۇرانداۋمەن بولدى. ەڭ الدىمەن وزىنە قاشاندا قولداۋ كورسەتىپ جۇرگەن اعالارىمەن قۇشاقتاسىپ كورىسكەن قانات، ۇلتتىق كيىم كيگەن قازاق ارۋلارىنىڭ قوشەمەتىمەن سىرتقا بەتتەدى.
كوپشىلىك الدىندا امالبەك تشانوۆ بارشا قازاقستاندىق جانكۇيەرلەردىڭ اتىنان قاناتتىڭ يىعىنا شاپان جاپتى.
«قازاق حالقىنىڭ ءار كەزدە دە وزدەرىنىڭ باتىرلارى بولعان. قانات - بۇگىنگى قازاق باتىرى. ويتكەنى، ول قازاقتىڭ كوك بايراعىن جەلبىرەتىپ، قازاق حالقىن بۇكىل الەمگە تانىتىپ جۇرگەن ارداقتى ۇلىمىز»، - دەدى ا. تشانوۆ.
ءوز كەزەگىندە قاناتتىڭ قامقورشى اعالارىنىڭ ءبىرى باۋىرجان وسپانوۆ تا قاناتتى كەزەكتى جەڭىسىمەن قۇتتىقتاپ، الداعى ۋاقىتتا دا جانكۇيەرلەرىن قۋانتا بەرۋىنە تىلەكتەستىك ءبىلدىردى.
ال وليمپيادا چەمپيونى ەرماحان ىبىرايىموۆ: «تۋعان ەلگە قوش كەلدىڭ قانات»، «جاساسىن، قانات!»، «قازاقستان العا!» - دەپ، تاعى دا ۇران تاستادى.
وسىدان كەيىن، «ۇلىمنىڭ تۇساۋى كەسىلسە ەكەن» دەپ ۇمىتتەنىپ كەلگەن قاناتتىڭ تىلەگى ورىندالدى. كوپشىلىك الدىنا ونىڭ كىشكەنتاي ۇلى ابىلايحان شىعارىلىپ، اياعىنا الا ءجىپ بايلاندى. ءسويتىپ، قاۋمالاعان جۇرتتىڭ سۇيەمەلدەۋىمەن اياعىن ءتاي- ءتاي باسقان ابىلاي باسپالداقپەن جوعارى قاراي ءجۇرىپ اكەسىنە جەتتى. قانات ۇلىنىڭ تۇساۋىن كەسىپ، ونى مەيىرلەنە قۇشاعىنا باستى.
ءوز سوزىندە قانات قاتتى تولقىپ، بۇل توسىن سىيعا قاتتى ريزا بولعاندىعىن جەتكىزدى.
«اسسالاۋماعالەيكۇم حالقىم! مۇنداي توسىن سىي بولادى دەپ ويلاماعان ەدىم. كوپ راحمەت سىزدەرگە! مۇنىڭ بارلىعى، ەلدىگىمىزدىڭ، ەگەمەندىگىمىزدىڭ ارقاسى دەپ بىلەمىن. تىنىشتىق بولماسا ءبىزدىڭ بوكس، ءبىزدىڭ ولەڭ كىمگە كەرەك. سوندىقتان مەن وتە قۋانىشتىمىن. راحمەت سىزدەرگە!»، - دەدى ق. يسلام.
ول سونىمەن قاتار، وزىنە قامقورشى بولىپ جۇرگەن اعالارىنا زور ريزاشىلىعىن ءبىلدىرىپ، الداعى ۋاقىتتا دا جانكۇيەرلەرىن جاڭا جەڭىستەرىمەن قۋانتۋعا كۇش سالاتىندىعىن جەتكىزدى.
«قازاقتىڭ كوك تۋىن كوككە جەلبىرەتۋ، قازاقتى بۇكىل الەمگە تانىتۋ مەنىڭ بالا كۇنگى ارمانىم. مەنىڭ تىلەرىم، قازاق ەلىندە تەك تىنىشتىق بولسا ەكەن. جەتىستىكتەرگە جەتىپ جاتقانىمىزدىڭ بارلىعى وسى تىنىشتىقتىڭ ارقاسى. مەن الداعى ۋاقىتتا دا سىزدەردى جاڭا جەڭىستەرىممەن قۋانتامىن دەپ ويلايمىن»، - دەدى قانات يسلام.
اۆتور: ايبوتا جاپپاربەرگەن
سۋرەت پەن كەسكىن قامشى سايتىنان الىندى