دەنساۋلىق: ارانىڭ شاققانى نەگە شيپالى؟
ەڭ العاشقى اپيتەراپيالىق كلينيكا ماسكەۋدە ميحايل ميرونوۆيچ فرەنكەلدىڭ باستاۋىمەن اشىلدى. ال ءبىزدىڭ ەلدە كەيىنگى جىلدارى عانا قولعا الىنا باستادى. مامانداردىڭ ايتۋىنشا، ارانىڭ ۋىمەن ەمدەلۋ ارقىلى كوپتەگەن اۋرۋ تۇرلەرىنەن ايىعۋعا بولادى.
ارانىڭ بىزگە نەگىزىنەن جۇيكە جۇيەسى، جۇرەك قان- تامىرلارى اۋرۋلارى كەزىندە قولدانىلادى. ءبىراق بۇل ەمدى اۋرۋ اسقىنباي تۇرىپ الۋ كەرەك. سونىمەن قاتار، ينسۋلت العان ادامدار، پرەپاراتتار كومەكتەسپەگەن جاندار وسى ەمگە جۇگىنەدى. ارانىڭ ۋلى بولاتىنىن ءارقاشان ەستە ۇستاۋ كەرەك. پروتسەدۋرا كەزىندە قولايسىزدىق تۋماس ءۇشىن ادامدار مەديتسينالىق تەكسەرۋدەن ءوتىپ كەلۋى كەرەك. اسىرەسە، قان كورسەتكىشىنە نازار اۋدارىلادى. العاشىندا 5 سەكۋنتتاي عانا شاقتىرىپ اللەرگياسى بار جوعى باقىلانادى.
ال ارامەن ەمدەۋ كۋرسى ونىڭ سانىنا تاۋەلدى. ەڭ ازى 30 ارادان باستاپ، 70، 150 اراعا دەيىن شاقتىرىپ دەرتكە شيپا تابۋعا بولادى. تەك ەسكەرەتىن جايت، ءبىر كۇندە 12 ارادان ارتىق شاقتىرۋعا بولمايدى. مولشەرى تىم كوپ بولسا ۋلانىپ قالۋ قاۋپى بار. سول سەبەپتى دە تىكەلەي ماماننىڭ باقىلاۋىمەن جۇزەگە اسادى.
ارانىڭ بىزگەگىن الىپ قاراساق تارماقتىڭ باسىندا ونىڭ ۋىنا تولى قالتاشا بار. بۇل قالتاشانىڭ ءىشى 30 مينۋتتا بوسايدى، ياعني ارا شاققاننان كەيىن ءتىندى ادام دەنەسىندە قالتاشا بوس قالعانشا 30 مينۋت ۇستاۋعا بولادى دەگەن ءسوز.
بۇل جاندىكتىڭ ارقاسىندا ەمدەلىپ جۇرسەڭىز ماماندار تاراپىنان ۇسىنىلاتىن مىنا كەڭەستەردى ەستەن شىعارماڭىز:
• ۋاقىتىمەن تاماقتانۋ؛
• ەم- شاراعا اشقارىندا كەلۋگە بولمايدى؛
• اللەرگيالىق رەاكسيالار تۋدىراتىن تاعامداردان باس تارتۋ كەرەك؛
• سيترۋستى جەمىستەر، شوكولود، قويۋ شاي مەن كوفە، ىشىمدىك ىشۋگە تىيىم سالىنادى؛
• بال جەۋگە رۇقسات.
بۇل جاندىكتىڭ وتە ەڭبەكقور ەكەنىن بىلەمىز. ادامنىڭ دا ۇزاق جاساۋىنا ىقپالى بار بۇل جاندىك شاعىپ السا شوشىماڭىز، تەك شيپالى بولسىن دەڭىز.