قازاقستاندا ەكى بوكسشى قىز چەمپيوناتتاعى ورىنعا تالاسىپ قالدى
ۇلكەن جارىس قارساڭىندا ق ر بوكس فەدەراتسياسىندا قۇراماداعى ءبىر ورىن ءۇشىن كيكىلجىڭ ورىن الدى.
قازاقستاننىڭ ەكى دۇركىن چەمپيونى، 2014-جىلى وتكەن جاستار اراسىنداعى الەم چەمپيوناتىنىڭ جەڭىمپازى، 60 كەلى سالماقتا بوكستاساتىن نازىم يشانوۆا ادىلدىككە جەتۋ ءۇشىن جۋرناليستەردەن كومەك سۇرادى. نازىمنىڭ ايتۋىنشا، استانادا وتەتىن الەم چەمپيوناتىنا نەبارى 10 كۇن قالعاندا ونى جارىسقا قاتىسۋ قۇقىعىنان ايىرعان. نازىم تۇسىندىرگەندەي، ونى جاتتىعۋ پروتسەسىندەگى سپاررينگتىڭ (سپاررينگ - سپورتشىنى جارىسقا جان-جاقتى دايىنداۋ ماقساتىندا وتكىزىلەتىن جاتتىعۋ -اگەنتتىك) قورىتىندىسىنا سۇيەنە وتىرىپ، الەم چەمپيوناتىنان الاستاتقان. ءبىراق، بۇل ەش قيسىنعا كەلمەيدى، دەيدى بوكسشى قىز.
«وسى جىلدىڭ اقپانىندا مەن قازاقستان رەسپۋبليكاسىنداعى بوكسشى قىزدار اراسىندا ءبىرىنشى ورىن الدىم، سوندىقتان دا، الەم چەمپيوناتىنا قاتىسۋىم كەرەك ەدى. ەندى مىنە، چەمپيوناتقا ون كۇن قالعاندا سپاررينگ ۇيىمداستىرىپ، مەنى جارىستان الىپ تاستادى. ايتاتىن ۋاجدەرى دە ءارتۇرلى، مەن سپاررينگتە جەڭىلىپ قالدى دەيدى. ءبىراق، مەن جەڭدىم، ءتىپتى، سول سوڭعى سپاررينگتە جەڭگەنىمدى دالەلدەيتىن بەينەجازبا بار»، - دەيدى 19 جاستاعى نازىم.
نازىمنىڭ سول سپاررينگتەگى قارسىلاسى - قازاقستان چەمپيوناتىندا ەكىنشى ورىن العان ريمما ۆولوسەنكو ەكەن. نازىمنىڭ ورنىنا الەم چەمپيوناتىنا شىعامىن دەپ وتىرعان دا - وسى ريمما. ونىڭ جەكە جاتتىقتىرۋشىسى - بەرىك مارجىكپايەۆ. مارجىكپايەۆ سونداي-اق استانا قالالىق دەنە شىنىقتىرۋ جانە سپورت باسقارماسىنىڭ باسشىسى. نازىم يشانوۆانىڭ ايتۋىنشا، سوڭعى سپاررينگتە قازاقستان قىزدار قۇراماسىنىڭ باس جاتتىقتىرۋشىسى ۆاديم پريسياجنيۋك، مەملەكەتتىك جاتتىقتىرۋشى بولات ءابدىراحمانوۆ، اقمولا وبلىسى، قاراعاندى مەن كوكشەتاۋ قالالارىنان كەلگەن وزگە دە جاتتىقتىرۋشىلار وتىرعان.
«ريمما ۆولوسەنكو الەم چەمپيوناتىندا قازاقستاننىڭ نامىسىن قورعاي المايدى، وعان لايىق ەمەس، سەبەبى، ول جاسوسپىرىمدەر اراسىنداعى، جاستار اراسىنداعى، ەرەسەكتەر اراسىنداعى ءۇش چەمپيوناتتا دا ەشقاشان جەڭىپ كورمەگەن»، - دەيدى نازىم.
ايتا كەتەيىك، 19-27- مامىر ارالىعىندا استانادا وتەتىن الەم چەمپيوناتىندا وليمپيادا ويىندارىنىڭ ليتسەنزيالارى ۇتىسقا تىگىلەدى. سوندىقتان، ماسەلەنىڭ ءمان-جايىن انىقتاۋ ءۇشىن قازاقستان بوكس فەدەراتسياسىنا حابارلاسىپ، ۆاديم پريسياجنيۋك پەن بولات ءابدىراحمانوۆتىڭ پايىمدارىن تىڭدادىق.
ەكى تورەشى دە نازىم يشانوۆا 2016-جىلعى قازاقستان چەمپيوناتىن جەڭگەنىن راستادى. ءبىراق، ولاردىڭ ايتۋىنشا، چەمپيوناتتا ەكىنشى جانە ءۇشىنشى ورىن العاندار بار. رەسپۋبليكالىق دەڭگەيدەگى جارىستاردان كەيىن ءبىرىنشى قۇرام قىتايدا وتكەن بىلىكتىلىك جارىسىنا اتتاناتىنى حابارلانعان، قىتايعا بارعان ءۇش سپورتشىدان تەك داريعا شاكيموۆا عانا وليمپيادا ليتسەنزياسىن جەڭىپ العان. ال، الەم چەمپيوناتى الدىندا ەكى وقۋ-جاتتىعۋ وتكىزگەننەن كەيىن جاتتىقتىرۋشىلاردىڭ اراسىندا پىكىرتالاس تۋىنداپ، ولار الەم چەمپيوناتىندا ەل نامىسىن قورعايتىن ناعىز سپورتشىنى انىقتاۋ ءۇشىن سپاررينگ ۇيىمداستىرامىز دەپ شەشكەن ەكەن.
«ءاربىر جاتتىقتىرۋشى ءوز وقۋشىسى ءۇشىن الاڭدايدى، ءبىراق، شىندىققا تۋرا قاراۋ كەرەك. يشانوۆا جاقسى سپورتشى، ءبىراق قىتايدا وتكەن جارىستان كەيىن ول ءوز فورماسىن ازداپ جوعالتتى. سپاررينگتە ول ۇتىلدى»، - دەيدى ب. ءابدىراحمانوۆ.
يشانوۆا دا، جاتتىقتىرۋشىلار دا ايتىپ تۇرعان سپاررينگتىڭ ناتيجەسى 8- مامىر كۇنى بوكس فەدەراتسياسىنىڭ سايتىنا جاريالانعان. بۇل رەتتە، ۆ. پريسياجنيۋكتىڭ ايتۋىنشا، سول كۇنى سپاررينگكە كارىم ماحمۇدوۆ، قايرات ماناشيەۆ. ءشامىل سايفۋللين، الەكساندر ۆىسوتسكي، ياعني، جاتتىقتىرۋشىلار كەڭەسىنىڭ مۇشەلەرى قاتىسقان.
«قىتايدا وتكەن بىلىكتىلىك تۋرنيرىنان كەيىن مەن سپاررينگ وتەتىنىن ەسكەرتكەم جانە كەيبىر سالماق بويىنشا كىم مىقتى بولسا، الەم چەمپيوناتىنا سول قاتىساتىنىن دا ايتقام. نازىمنىڭ سول كەزدەگى فورماسى مەن قازىرگى دايىندىعىن سالىستىرساق، اراسى جەر مەن كوكتەي. بۇل جاي سپاررينگ ەمەس، ءبارى قاراپ، باقىلايتىن جاتتىعۋ بولاتىنىن ايتقام. سوندىقتان، «سپاررينگ بولاتىنىن بىلگەن جوقپىز» دەگەندەرى وتىرىك. نازىم ايتىپ تۇرعان ۆيدەو بىزدە دە بار، ونى جەتەكشى دە كوردى. سپاررينگكە قاتىسقان ءۇش جۇلدىزى بار جاتتىقتىرۋشىلار جەڭىستى ريمما ۆولوسەنكوعا بەردى. نازىم وتە جاس سپورتشى، 1997-جىلى تۋعان. ول جاستار اراسىنداعى قۇرامادان ەندى شىعىپ، ەرەسەكتەر اراسىنا ەندى عانا قوسىلدى. ونىڭ بولاشاعى ءالى الدا، وعان ءالى كوپ جاتتىعۋ كەرەك. ەل چەمپيونى بولعان سوڭ، الەم چەمپيوناتىنا جول اشىلدى دەپ ويلاعانى دۇرىس ەمەس»، - دەيدى ءوز ويىن ايتقان ۆاديم پريسياجنيۋك.
ۆاديم پريسياجنيۋك اتاپ وتكەندەي، فەدەراتسيا مەن بوكسشى اراسىنداعى كەلىسىمشارتقا سايكەس، بوكسشىلارعا فەدەراتسيانىڭ كەلىسىمىن الماي، ب ا ق- قا مالىمدەمە جاساۋعا بولمايدى. بۇل رەتتە، نازىم يشانوۆا كەلىسىمشارتتى بۇزعانى ءۇشىن جازالانا ما، جوق پا، بەلگىسىز ەكەنىن اتاپ ءوتتى ول.
اۆتور: كەنجەكەي توقتامۇرات قىزى