قازاقستان اگرووداعى باسشىسى: جەر كودەكسىنىڭ جاڭا نورمالارىن اۋىل ادامدارى كۇتكەن ەدى
«مەنىڭ ويىمشا، ءبىزدىڭ اۋىل شارۋاشىلىعىمىزدىڭ، اگروونەركاسىپتىك كەشەنىمىزدىڭ دامۋىنا سەرپىن بەرەتىن، جالپى جۇمىس ورىندارىن اشۋعا جانە ەل ەكونوميكاسىنىڭ وركەندەۋىنە ىقپال جاسايتىن شەشىم شىعارۋىمىز كەرەك. ءبىزدىڭ قاۋىمداستىق اۋىل شارۋاشىلىعى كووپەراتيۆتەرىمەن كوپ تالقىلاۋلار جۇرگىزدى. ولاردىڭ پىكىرلەرىن بىلدىك، وزگە دە ۇيىمداردىڭ ويلارىن تىڭدادىق. اۋىل ادامدارىنىڭ كوكەيىندە جۇرگەن بارلىق ماسەلەگە قانىقپىز. جەر كودەكسىنىڭ جاڭا نورمالارىن اۋىل ادامدارى كۇتىپ وتىرعان ەدى، جالپى ونى قولداپ تا كەلدى»، - دەيدى ا. ساعىندىقوۆ.
ا. ساعىندىقوۆ جاڭا نورمالاردىڭ نەگىزگى قاعيداتتارى جونىندە حالىققا ءتۇسىندىرۋ جۇمىستارى جەتكىلىكتى دارەجەدە جۇرگىزىلمەگەن دەگەن ويمەن كەلىسىپ وتىر.
«سوندىقتان جەرگىلىكتى جەرلەردە حالىققا وسى نورمالاردىڭ پراكتيكالىق قولدانىلۋى تۋرالى ماسەلەلەردى ءتۇسىندىرۋ كەرەك. بۋكلەتتەر مەن بروشيۋرالار دايىنداپ، اۋىل ادامىنا، قاراپايىم شارۋالارعا تۇسىنىكتى بولاتىنداي، گرافيكتەرمەن، ناقتى مالىمەت-دەرەكتەرمەن اقپاراتتاندىرۋ قاجەت. ءبىزدىڭ كوميسسيادا جۇمىس جاساپ وتىرعان ءوڭىر وكىلدەرى وسى جۇمىستى وزدەرىنىڭ مويىندارىنا الا الادى»، - دەپ ەسەپتەيدى ول.
ا. ساعىندىقوۆ، سونداي-اق جەردى ۇتىمدى پايدالانۋ، قورشاعان ورتانى، ەكولوگيالىق ستاندارتتاردى باقىلاۋ تەتىكتەرىن كۇشەيتۋ قاجەتتىگىن دە ەرەكشە اتاپ ءوتتى.
اۆتور: جاسۇلان جولدىبايەۆ