حوككەي: قازاقستان قۇراماسى شەشۋشى ويىندا لاتۆيادان جەڭىلىپ قالدى
«قازسپورت» تەلەارناسىنان تىكەلەي ەفيردە كورسەتكەنىندەي، قازاقستاندىقتار ماتچتى ءساتتى باستاپ، 4-مينۋتتا نيكيتا يۆانوۆ ەسەپ اشتى. ويىننىڭ ەكىنشى كەزەڭىندە 35-مينۋتتا رومان ساۆچەنكونىڭ قاتەلىگىنەن كەيىن كاسپارس داۋگاۆينىش تارازى باسىن تەڭەستىردى.
كەزدەسۋ اياقتالۋعا بەس مينۋت ۋاقىت قالعاندا، ماريس بيچيەۆسكيس كومانداسىن العا شىعاردى. بۇل ويىندا قازاقستان قۇراماسىنىڭ قاقپاشىسى ۆيتالي كولەسنيك بىرنەشە رەت كومانداسىن گولدان قۇتقارىپ قالعانىن ايتۋ كەرەك. ال قازاقستاندىق ويىنشىلار ءوز مۇمكىندىكتەرىن پايدالانا المادى.
ءسويتىپ لاتۆيالىقتاردىڭ ەنشىسىندە التى ۇپاي بولسا، اندرەي نازاروۆتىڭ شاكىرتتەرى بار بولعانى ەكى-اق ۇپايمەن ءوز توبىندا سوڭعى ورىندى يەلەنىپ، كۇشتىلەر ديۆيزيونىنان شىعىپ قالدى.
قازاقستان قۇراماسى سوڭعى كەزدەسۋىن 16-مامىر كۇنى دانيامەن وتكىزەدى، الايدا ول ماتچ قازاقستاندىقتار ءۇشىن ەشتەڭەنى دە شەشپەيدى.
اۆتور: ەلجان ەرالى