شارۋالاردىڭ قۇندى ۇسىنىس-پىكىرلەرى جەر رەفورماسى بويىنشا كوميسسياعا جەتكىزىلەتىن بولادى - ب ق و اكىمى - فوتو
بۇل تۋرالى سەنبى كۇنى تەرەكتى اۋدانىندا بولىپ، اۋىل شارۋاشىلىعى تاۋارىن وندىرۋشىلەرمەن كەزدەسكەن باتىس قازاقستان وبلىسىنىڭ اكىمى التاي كولگىنوۆ ءمالىم ەتتى.
ونىڭ ايتۋىنشا، جەرمەن پايدالانا بىلەتىن، جاڭا تەحنولوگيالار قولدانىپ، ونى ءتيىمدى يگەرۋمەن بىرگە سوعان جانى اشيتىن ازاماتتار اينالىسۋى كەرەك. سونىمەن قاتار حالىقتىڭ جەكە مالى جايىلاتىن جەر دە قاجەت. «وسى ورايدا جەردى جاقسى بىلەتىن شارۋالاردىڭ ۇسىنىستارى وتە ورىندى. بۇل ماسەلەلەردى سالا ماماندارى مەن ءوڭىر تۇرعىندارىن شاقىرا وتىرىپ، قوعامدىق كەڭەس وتىرىسىندا تالقىلايتىن بولامىز. سودان كەيىن ءبارىن جيناقتاپ، ۇكىمەت قۇرعان كوميسسياعا جەتكىزۋگە دايىنبىز»، دەدى اكىم.
ءوڭىر باسشىسى جۇمىس ساپارى بارىسىندا پويما ستانساسىنداعى «تەرەكتى ماي زاۋىتى» ج ش س، پودستەپنىي اۋىلدىق وكرۋگى اۋماعىنداعى «بالاكيريەۆ»، «جاقسىمبەتوۆ» شارۋا قوجالىقتارىندا بولىپ، اقجايىق اۋىلدىق وكرۋگىندە ورال-شالقار ارناسىن قايتا قۇرۋ جۇمىسىمەن تانىستى.
پويما ماي زاۋىتى ءبىراز ۋاقىت توقتاپ تۇرعانى بەلگىلى. تەك 2014-جىلدان بەرى جاڭا ينۆەستوردىڭ كەلۋىمەن جۇمىسى جاندانعان زاۋىت ونىمدىلىگى ەكى ەسە دەرلىك ءوستى. جابدىقتى جاڭارتۋعا 700 ميلليون تەڭگە جۇمسالدى. اكىمنىڭ اتاپ وتكەنىندەي، بۇرىن مۇندا تەك كۇنباعىس مايى شىعارىلسا، ەندى قىشا مايى جانە باسقا ونىمدەر وندىرىلە باستادى. سونىڭ ىشىندە مايونەز بەن مارگارين وندىرۋگە زاۋىت جابدىعى دايىن. ەندى ق ر اۋىل شارۋاشىلىعى مينيسترلىگى مەن «قازاگرو» ۇلتتىق حولدينگى اينالىم قارجىسىن تولىقتىرۋعا قولداۋ تانىتسا، زاۋىتتىڭ قالىپتى جۇمىس جاسايتىنى انىق.
«بالاكيريەۆ» شارۋا قوجالىعى مەملەكەتتىڭ قولداۋىمەن جاڭا تەحنولوگيا نەگىزىندە كارتوپ ءوسىرۋدى قولعا الۋمەن بىرگە سول ءونىمدى ساقتايتىن كوكونىس قويماسىن دا جولعا قويدى. ال «جاقسىمبەتوۆ» شارۋا قوجالىعى گەرەفورد تۇقىمدى ءىرى قارا باسىن قازىردىڭ وزىندە 759 عا جەتكىزىپ وتىر. بولاشاقتا ونىڭ باسىن 2 مىڭ باسقا دەيىن ۇلعايتۋ كوزدەلۋدە. شارۋا قوجالىعىندا قازىر مال جايىلىپ، ەگىس ەگىلەتىن 3684 گەكتار جەر بار. قوجالىق باسشىسى يبراگيم جاقسىمبەتوۆ شارۋاشىلىقتى كەڭەيتۋ ءۇشىن قوسىمشا جەر قاجەتتىگىن، بۇل ورايدا وبلىس باسشىسى قولداۋ بولاتىنىن جەتكىزدى.
پودستەپنىي اۋىلدىق وكرۋگىنە قاراستى يۋبيلەينىي ەلدى مەكەنىندە وتكەن جىلى اشىلعان جاڭا مەكتەپتە بولعاننان كەيىن ا. كولگىنوۆ ورال-شالقار ارناسىنا ات باسىن بۇردى. بۇرىن مۇندا سورعى ستانساسى بولعان ەكەن. قازىرگى كەزدە مەردىگەر ۇيىم ونى ىسكە قوسۋمەن اينالىسۋدا. جۇمىس ەكى اي ىشىندە بىتپەك. جوبا بويىنشا ارنا بويىنداعى سۋ 45 شاقىرىمعا جەتكىزىلمەك. سوندا مال باسىن كوبەيتۋگە، جەم-شوپ ءوندىرىسىن دامىتۋعا مۇمكىندىك تۋماق. سونىمەن قاتار 35-40 مىڭ گەكتار سۋارمالى جەر بولماق.
- جالپى العاندا، وڭىردە اۋىل شارۋاشىلىعىن دامىتۋ ءۇشىن مۇمكىندىك مول. ەڭ باستىسى، جاڭا جوبالاردى قولعا الىپ، جۇزەگە اسىرا ءبىلۋ كەرەك. ەلباسى تاپسىرماسىنا سايكەس مەملەكەت تاراپىنان دەمەۋقارجى تۇرىندە جانە تەحنيكا ساتىپ الۋ مەن جابدىقتى جاڭارتۋ شىعىندارىن جابۋ ءۇشىن قولداۋ كورسەتىلەتىن بولادى. ءبىزدىڭ مىندەتىمىز - قولدا بار مۇمكىندىكتەردى پايدالانا وتىرىپ، اۋىل شارۋاشىلىعىن وركەندەتۋ، - دەدى وبلىس باسشىسى.