بۇگىن «تارلانبوز» جانە «مەنىڭ جالعىز سەرىگىم» اتتى سۋ جاڭا كىتاپتار وقىرمانعا جول تارتتى - فوتو

استانا. قازاقپارات - بۇگىن ۇلتتىق اكادەميالىق كىتاپحانادا مەملەكەتتىك سىيلىقتىڭ لاۋرەاتى، «قۇرمەت» جانە «پاراسات» وردەندەرىنىڭ يەگەرى، م. اۋەزوۆ اتىنداعى ۇلتتىق جۇلدەنىڭ، حالىقارالىق شولاقوۆ اتىنداعى جۇلدەنىڭ يەسى، تاريحي روماندار اۆتورى دۇكەنباي دوسجاندى ەسكە الۋ كەشى ءوتىپ، «تارلانبوز» اتتى كىتابىنىڭ تۇساۋى كەسىلدى.

 سونداي- اق، دۇكەنباي دوسجاننىڭ ومىردەگى، ادەبيەتتەگى سەرىگى ساۋلە دوسجاننىڭ اسىل جارىنا دەگەن ساعىنىشتان تۋعان «مەنىڭ جالعىز سەرىگىم» اتتى كىتابى وقىرمانعا جول تارتتى.

دۇكەنباي دوسجان 2013 - جىلى قىركۇيەكتىڭ ون تورتىندە دۇنيەدەن وتكەن. 1942 - جىلى سۇراپىل سوعىس كەزىندە تۋعان دۇكەنباي نەبارى 15 جاسىندا «كوكپار» اتتى اڭگىمەسىن جازعان ەكەن. ال، قازىردە جازۋشىنىڭ شىعارمالارى الەمنىڭ 20 تىلىنە اۋدارىلىپ، 3,7 ميلليون تيراجبەن شىققان. جازۋشى 24 جاسىندا «وتىرار» پوۆەسىن جازىپ، تاريحي رومانعا قالام تارتقان العاشقى قازاق جازۋشىلارىنىڭ ءبىرى اتانادى. ايتا كەتەيىك، بۇل كىسى ۇلتتىق قاۋىپسىزدىك كوميتەتىنىڭ جابىق ارحيۆىنە بارىپ، دەرەك العان العاشقى جازۋشى. سول ءارحيۆتىڭ قۇجاتتارى نەگىزىندە 1992 -جىلى «تۇرمە» جانە 1993 -جىلى جەلتوقسان وقيعاسى تۋرالى «الاڭ» اتتى كوركەم رومان جازىپ شىققان.

مىنە، بۇگىن، جازۋشىنى ەسكە الۋعا ارنالعان «تارلانبوز» كىتابىمەن قاتار، جازۋشىنىڭ اياۋلى جارى ساۋلە دوسجاننىڭ دا «مەنىڭ جالعىز سەرىگىم» اتتى سىرلى كىتابى جارىق كوردى. ساۋلە دوسجان دۇكەنباي جازۋشىنىڭ مۇراسىن ساقتاپ، اماناتىن ارقالاپ كەلەدى. سوندىقتان بولار، جازۋشىنىڭ ادەبيەتى مەن مۇراسى وقىرمانعا جەتسىن دەپ، جاس ۇرپاق وقىپ- ءبىلسىن دەپ، بۇگىن ۇلتتىق اكادەميالىق كىتاپحانادان دۇكەنباي دوسجان ۇلىنا ارناپ «جازۋشى» زالىن اشتى. «جازۋشى» زالىنا دۇكەنباي دوسجاننىڭ كىتاپتارى، ماراپاتتارى، جازۋ ۇستەلى مەن شىعارماشىلىعىندا تۇتىنعان زاتتارى، ەستەلىك سۋرەتتەر قويىلعان.

جالپى، دۇكەنباي دوسجاندى ەسكە الۋ كەشىنە ق ر پارلامەنتىنىڭ دەپۋتاتتارى، ەلىمىزگە تانىمال اقىن- جازۋشىلار، سونداي- اق، زيالى قاۋىم وكىلدەرى قاتىستى. كەش بارىسىندا جازۋشىنىڭ ءومىرى مەن شىعارماشىلىعىنا ارنالعان دەرەكتى فيلم جانە سلايد كورسەتىلىپ، جازۋشى، تەلەدراماتۋرگ سۇلتان ورازالين، اقىن، مەملەكەتتىك سىيلىقتىڭ يەگەرى نەسىپبەك ايت ۇلى، فيلولوگيا عىلىمدارىنىڭ دوكتورى، پروفەسسور سەرىك نەگيموۆ، قالامگەردىڭ جارى، اقىن، ق ر ەڭبەك سىڭىرگەن قايراتكەرى، ق ر ءماجىلىسىنىڭ قىزمەتكەرى، جازۋشىنىڭ جارى ساۋلە دوسجانوۆا ەستەلىكتەرىمەن ءبولىستى.