جەر رەفورماسىندا ۇسىنىلعان تاسىلدەر ەكونوميكالىق تۇرعىدا نەگىزدەلگەن - ق. بيشىمبايەۆ

استانا. قازاقپارات - بۇگىن جەر رەفورماسى بويىنشا كوميسسيانىڭ العاشقى وتىرىسىندا ق ر ۇلتتىق ەكونوميكا ءمينيسترى، كوميسسيا مۇشەسى قۋاندىق بيشىمبايەۆ سالاداعى رەفورمالاردان كۇتىلەتىن ناتيجەلەردى بايانداپ بەردى.

«الەمگە بەلگىلى McKinsey&Company حالىقارالىق كونسالتينگتىك كومپانياسى مەن ءبىزدىڭ مينيسترلىكتىڭ ەسەبى بويىنشا قازاقستاندا 1,7 ميلليون گەكتار جەردى نارىقتىق اينالىمعا ەنگىزگەن كەزدە، قوسىمشا جالپى ىشكى ونىمدە 5 جىلدىڭ ىشىندە 50 ميلليارد تەڭگە اۋىل شارۋاشىلىعى ونىمدەرى وندىرىلەدى. جەردى جەكەمەنشىككە بەرۋ ونىمدىلىكتى ارتتىرۋعا مۇمكىندىك بەرەدى جانە ونىڭ ەكونوميكالىق تيىمدىلىگى 80-110 ميلليارد تەڭگەنى قۇرايدى»، - دەدى ق. بيشىمبايەۆ.

وسى ورايدا ول قوسىمشا جەردى يگەرۋ ينۆەستيتسيالاردى ارتتىراتىنىن، 120-150 ميلليارد تەڭگەگە دەيىن قوسىمشا ەكونوميكالىق تيىمدىلىكتى بەرەتىنىن جەتكىزدى. اۋىلدى ەلدى مەكەندەردە كەدەيلىكتى تومەندەتۋگە مۇمكىندىك جاسالادى. وسى رەفورما ىسكە اسىرىلعان جاعدايدا ونىڭ تيىمدىلىگى 50 پايىزعا دەيىن جوعارى بولۋعا مۇمكىندىك بار.

«ءبىزدىڭ ەسەبىمىز بويىنشا، 1,7 ميلليون گەكتار جەردى اينالىمعا تارتۋ ەسەبىنەن جاڭادان 26,5 مىڭ جۇمىس ورنىن اشۋعا بولادى. قۇرمەتتى كوميسسيا مۇشەلەرى! قازاقستان ءۇشىن جەر رەفورماسىنىڭ قاجەت ەكەنى ءسوزسىز. ناتيجەلەرگە قول جەتكىزۋ ەلىمىزدە ازىق-تۇلىك قاۋىپسىزدىگى دەڭگەيىن ارتتىرۋعا، كەدەيلىكتى تومەندەتۋگە ىقپال ەتەدى. جالپى ۇسىنىلىپ وتىرعان تاسىلدەر ەكونوميكالىق تۇرعىدا نەگىزدەلگەن جانە ونى دۇرىس ىسكە اسىرعان كەزدە ۇلكەن جەتىستىكتەرگە جول اشىلادى»، - دەپ ءتۇيدى ءسوزىن ق. بيشىمبايەۆ.

    
اۆتور: رۋسلان عابباسوۆ