ق. بيشىمبايەۆ : جەر رەفورماسى ەشقاشان ءوندىرىستى تومەندەتپەيدى، كەرىسىنشە ءاردايىم ءتيىمدى ناتيجەلەرگە الىپ كەلەدى

استانا. قازاقپارات - قازاقستان اۋىل شارۋشىلىعى كورسەتكىشتەرى الەمدىك كورسەتكىشتەردەن ايتارلىقتاي تومەن.

بۇگىن جەر رەفورماسى بويىنشا كوميسسيانىڭ العاشقى وتىرىسىندا ق ر ۇلتتىق ەكونوميكا ءمينيسترى، كوميسسيا مۇشەسى قۋاندىق بيشىمبايەۆ وسىلاي ءمالىم ەتتى.

«قازىرگى ۋاقىتتا قازاقستان اگرويندۋستريالدى ەل بولىپ تابىلعانىمەن، تاماق ونىمدەرى مەن سۋسىندارى جالپى تۇتىنۋداعى يمپورتىنىڭ ۇلەسى 25,6 پايىز بولادى. قازاقستان اۋىل شارۋشىلىعى كورسەتكىشتەرى الەمدىك كورسەتكىشتەردەن ايتارلىقتاي تومەن. ماسەلەن، اۋىل شارۋاشىلىعىنداعى ەڭبەك ونىمدىلىگى ەكونوميكالىق ىنتىماقتاستىق جانە دامۋ ۇيىمى ەلدەرىنىڭ كورسەتكىشىنەن 10 ەسە، رەسەي كورسەتكىشىنەن 2 ەسە جانە بەلارۋس دەڭگەيىنەن 1,5 ەسە تومەن. ەڭبەكتىڭ كاپيتالىمەن جاراقتانۋى رەسەي كورسەتكىشىنەن 3 ەسە جانە بەلارۋس ەلىنەن 9 ەسە تومەن. وسىنىڭ بارلىعىنا ينۆەستيتسيا تارتۋ دەڭگەيىنىڭ تومەندىگى سەبەپ بولىپ جاتىر، سونداي-اق سوڭعى 10 جىلدىڭ ىشىندە اۋىل شارۋاشىلىعىنا ينۆەستيتسيا تارتۋ كولەمى بارلىق ينۆەستيتسيا قاراجاتىمەن سالىستىرعاندا، نەبارى 2 پايىزدى قۇراعان»، - دەپ توقتالدى مينيستر.

ونىڭ سوزىنە قاراعاندا، سوندىقتان جەر زاڭناماسى ينۆەستيتسيا تارتۋ ماقساتىندا وتە ماڭىزدى شارا بولىپ تابىلادى. الەمدىك تاجىريبە كورسەتكەندەي، جەرگە مەنشىك قۇقىعى ينۆەستيتسيا اعىمىن ۇلعايتۋعا، جەر رەسۋرستارىن جاقسارتۋعا، اۋىل شارۋاشىلىعى ونىمدىلىگى مەن جۇمىس قامتۋ دەڭگەيىن ارتتىرۋعا سەپتىگىن تيگىزەدى. وسى رەتتە ول ءبىرقاتار ەلدەردىڭ تاجىريبەسىنە توقتالدى.

«كوپتەگەن الەمدىك تاجىريبەنى قورىتىندىلاي كەلە، جەر رەفورماسى ەشقاشان ءوندىرىستى تومەندەتپەيدى، كەرىسىنشە ءاردايىم ءتيىمدى ناتيجەلەرگە الىپ كەلەدى. ۋاقىتشا پايدالانۋعا بەرىلگەن جەرگە قاراعاندا، جەر يەلەرى وڭدەگەن جەردىڭ ونىمدىلىگى جوعارى»، - دەدى ق. بيشىمبايەۆ.

اۆتور: رۋسلان عابباسوۆ