ەلوردادا وقۋشىلار اراسىنداعى عىلىمي جوبالار بايقاۋىنىڭ جەڭىمپازدارى ماراپاتتالدى

استانا. قازاقپارات - ق ر تۇڭعىش پرەزيدەنتى مۋزەيىندە وقۋشىلار اراسىنداعى «الەمدى وزگەرتەتىن يدەيالار» بايقاۋىنىڭ جەڭىمپازدارىن ماراپاتتاۋ سالتاناتى ءوتتى، دەپ حابارلادى قالالىق اكىمدىكتىڭ باسپا ءسوز قىزمەتىنەن.

بايقاۋدا «كۇن ساۋلەسى ارقىلى جارىقتاندىرۋ قۇرىلعىسى» جانە «ەل ەكونوميكاسىنىڭ بالامالى تۇرگە - «جاسىل ەكونوميكا» فورماتىنا اۋقىمدى بەتبۇرىسى» تاقىرىبىنداعى جوبالارمەن اسحات ابۋباكىروۆ پەن اسەل ورىنبەكوۆا كوش باستادى.

ەلىمىزدىڭ تاۋەلسىزدىگىنىڭ 25 جىلدىعىنا ورايلاستىرىلعان شارا «100 ناقتى قادام» ۇلت جوسپارى شەڭبەرىندە قوعامداعى وزەكتى ماسەلەلەردى تانىپ-بىلۋگە جانە جۇزەگە اسىرۋعا باعىتتالعان وقۋشىلاردىڭ عىلىمي-زەرتتەۋشىلىك جانە وقۋ-تانىمدىق قىزىعۋشىلىعىن ىنتالاندىرادى.

بيىل بايقاۋ ەكىنشى رەت وتكىزىلدى، وعان 36 جوبامەن 46 بالا قاتىسىپ، وزدەرىنىڭ عىلىمي جوبالارىن قورعادى. بايقاۋ ءۇش كەزەڭمەن وتكىزىلدى. ءبىرىنشى تۋر قالالىق مەكتەپتەردە ۇيىمداستىرىلدى، سودان كەيىن جوبالار ساراپتامادان وتكىزىلدى، ال ءۇشىنشى كەزەڭدە مەكتەپتەر ءوزارا جارىستى.

قازىلار القاسىنىڭ شەشىمىمەن بايقاۋ جەڭىمپازدارى مەن جۇلدەگەرلەرى پوليتەحنيكالىق جانە گۋمانيتارلىق باعىتتار بويىنشا انىقتالدى. عىلىمي جوبالاردىڭ باسىم بولىگى قازاقستاندىقتاردىڭ ءومىر ءسۇرۋ ساپاسىن جاقسارتۋعا باعىتتالعان جوعارى تەحنولوگيالارعا ارنالعان.