الماتىدا قازاقستانداعى تۇڭعىش دزيۋدو اكادەمياسى اشىلدى

الماتى. قازاقپارات - بۇگىن الماتىدا كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنىڭ اۋماعىندا سالىنعان قازاقستانداعى تۇڭعىش دزيۋدو اكادەمياسى قولدانىسقا بەرىلدى.

ونىڭ اشىلۋ راسىمىنە ق ر مادەنيەت جانە سپورت ءمينيسترى ارىستانبەك مۇحامەدي ۇلى، الماتى قالاسىنىڭ اكىمى باۋىرجان بايبەك، حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر، قازاقستان دزيۋدو فەدەراتسياسىنىڭ پرەزيدەنتى كەڭەس راقىشەۆ، قازاقستان دزيۋدو فەدەراتسياسىنىڭ وكىلدەرى، ەلگە تانىمال دزيۋدوشىلار، جاس دزيۋدوشىلار جانە ب ا ق وكىلدەرى قاتىستى.

اكادەميانىڭ سالتاناتتى اشىلۋ ءراسىمى اياسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى مەن حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر قىزىل لەنتانى قيدى.

بۇدان كەيىن جينالعان قاۋىم الەمدىك ستاندارتتارعا ساي ەتىپ سالىنعان جاڭا دزيۋدو اكادەمياسىن ارالاپ كوردى. 4 جۇپ تاتامي توسەلەتىن كەڭ زالدا وتكەن سالتاناتتى جيىن بارىسىندا ق ر مادەنيەت جانە سپورت ءمينيسترى ارىستانبەك مۇحامەدي ۇلى، الماتى قالاسىنىڭ اكىمى باۋىرجان بايبەك جانە حالىقارالىق دزيۋدو فەدەراتسياسىنىڭ پرەزيدەنتى ماريۋس ۆيزەر ءسوز سويلەپ، يگى تىلەكتەرىن ءبىلدىردى.

جيىن سوڭىندا قازاقستان دزيۋدو فەدەراتسياسىنىڭ پرەزيدەنتى كەڭەس راقىشەۆ جاڭا دزيۋدو اكادەمياسىنىڭ سيمۆوليكالىق كىلتىن وسى مەكتەپ-ينتەرناتتىڭ تۇلەگى، 2015-جىلى دزيۋدودان كادەتتەر اراسىندا سارايەۆو قالاسىندا وتكەن الەم چەمپيوناتىنىڭ التىن جۇلدەگەرى ايبولات ىستىبايعا تاپسىردى.

سالتاناتتى جيىن سوڭىندا تاتاميگە شىققان جاس دزيۋدوشىلار كورنەكى سيپاتتا ءوز ونەرلەرىن پاش ەتتى.

ايتا كەتەلىك، دزيۋدو اكادەمياسى الەمدىك ستاندارتتارعا ساي ەتىپ سالىنعان. ونىڭ 4 جۇپ تاتامي توسەلەتىن الىپ زالىندا ءبىر مەزەتتە 200 ادامعا دەيىن جاتتىعا الادى. سونىمەن قاتار، اكادەميا اۋماعىندا جاتتىعۋ زالى، 100 ادامعا شاقتالعان 2 جانە 4 ورىندىق جاتاقحانا، 100 ادامعا ارنالعان اسحانا، دارىگەر كابينەتى، باسسەين، ساۋنا، كيىم جۋۋعا، كيىم ۇتىكتەۋگە جانە دەمالۋعا ارنالعان بولمەلەر بار.

دزيۋدو اكادەمياسىن سالۋعا شامامەن مەملەكەت-جەكە مەنشىك سەرىكتەستىك اياسىندا شامامەن 4,5 ميلليوننان استام ا ق ش دوللارى جۇمسالعان. سونىڭ ىشىندە 2,5 ميلليون ا ق ش دوللارى - جەكە ينۆەستيتسيا.

قۇرىلىس جۇمىستارىن قازاقستاننىڭ دزيۋدو فەدەراتسياسىنىڭ رەسمي دەمەۋشىسى - SATCompany كومپانياسى سالعان. اكادەميا اۋماعى 1 گەكتارعا جۋىقتايدى. ال اكادەميا عيماراتىنىڭ اۋماعى 4,5-5 مىڭ شارشى مەتردى قۇرايدى. بولاشاقتا بۇل بازادا تەك قازاقستاننىڭ ۇلتتىق قۇرامالارى عانا ەمەس، شەت ەلدىك ۇلتتىق قۇراما كوماندالار دا كەلىپ، وسى جەردە تولىققاندى وقۋ-جاتتىعۋ جيىندارىن وتكىزە الادى. سونىمەن قاتار، بۇل جەردە بىرلەسكەن وقۋ-جاتتىعۋ جيىندارى، سەمينارلار ۇيىمداستىرىلادى. بۇل اكادەمياعا بولاشاقتا حالىقارالىق مارتەبە بەرىلۋى مۇمكىن.

اۆتور: ايبوتا جاپپاربەرگەن