ەلوردا كورەرمەندەرى ءىليا جاقانوۆتىڭ ءان رومانستارىنا ءتانتى بولدى

استانا. قازاقپارات - قازاقستان رەسپۋبليكاسىنىڭ ۇلتتىق اكادەميالىق كىتاپحاناسىندا جازۋشى، كومپوزيتور، ونەر زەرتتەۋشىسى، قازاقستاننىڭ جانە قىرعىزستاننىڭ ەڭبەك سىڭىرگەن مادەنيەت قىزمەتكەرى، قازاقستاننىڭ ەڭبەك سىڭىرگەن قايراتكەرى، حالىقارالىق جامبىل اتىنداعى سىيلىقتىڭ لاۋرەاتى، «پاراسات» وردەنىنىڭ يەگەرى ءىليا جاقانوۆ وقىرماندارمەن كەزدەستى.

كورەرمەندەرگە ەرەكشە كوڭىل- كۇي سىيلاعان بۇل كەش انمەن باستالدى. قازاقستان رەسپۋبليكاسىنىڭ ەڭبەك سىڭىرگەن ءارتىسى، پروفەسسور كەنجەعالي مىرجىقباي كومپوزيتوردىڭ «جان ساۋلەم» ءانىن شىرقادى. ءانشى مەن كومپوزيتور اراسىنداعى سۇحبات تۇرىندە وتكەن كەزدەسۋ «ءىليا جاقانوۆتىڭ ءان رومانستارى» دەپ اتالدى.

ءىليا جاقانوۆ استانالىقتارعا ءومىر جولى، ايگىلى اندەرىنىڭ شىعۋ تاريحى تۋرالى اسەرلى اڭگىمەلەپ بەردى.

ك. مىرجىقباي كومپوزيتوردىڭ بالقانتاۋ، جەتىسۋ، قىرعىز تسيكلدىك رومانستارىنان اندەردى كەزەك- كەزەك شىرقاپ، كورەرمەندەردىڭ قوشەمەتىنە بولەندى.

وسى كەشتە ءى. جاقانوۆتىڭ الەمگە ايگىلى جازۋشى شىڭعىس ايتماتوۆپەن دوستىعى تۋرالى باياندالدى.

بۇدان كەيىن كومپوزيتور 1981 -جىلى دۇنيەگە كەلگەن جانە حالىقتىڭ ەرەكشە ىقىلاسىنا بولەنگەن «ەدىل- جايىق» ءان- پانوراماسىنىڭ شىعۋ تاريحى، جۇبان مولداعاليەۆتىڭ وعان ءسوز جازۋى جونىندە ايتىپ بەردى.

كەنجەعالي مىرجىقباي «ەدىل- جايىق» ءانىن زور تەبىرەنىسپەن ورىنداپ بەرگەندە، زالعا جينالعاندار ايرىقشا قۇرمەت كورسەتتى.

وسى كەشتە كومپوزيتوردىڭ «اسەلىم - ءانىم»، «جايلاۋكول كەشتەرى» جانە باسقا دا اندەرى ورىندالدى، ونەر سۇيەر قاۋىم ءان قايىرمالارىن قوسىلا ايتىپ وتىردى.

ءى. جاقانوۆ قوعام، مادەنيەت تۋرالى وي تولعادى. حالىقتىق مۋزىكانىڭ تەرەڭدىگىنە ءمان بەرىلۋى قاجەت ەكەنىن اتاپ ءوتتى. بۇگىنگى تاڭدا جاس ۇرپاقتىڭ ارزان، داڭعىرلاعان اۋەندەرگە ەلىكتەپ بارا جاتقانىنا وكىنىشىن ءبىلدىردى. اندەر مەن سۇحباتتى ۇيىپ تىڭداعان كىتاپحانا وقىرماندارىنا ريزاشىلىعىن جەتكىزدى.

بەلگىلى قوعام قايراتكەرى مىرزاتاي جولداسبەكوۆ ءوزىنىڭ سىنىپتاسى، دوسى ءىليا جاقانوۆ تۋرالى ويلارىمەن ءبولىستى.

ۇلتتىق اكادەميالىق كىتاپحانانىڭ باس ديرەكتورى، پەداگوگيكا عىلىمدارىنىڭ دوكتورى ءۇمىتحان مۇڭالبايەۆا كومپوزيتورعا شىعارماشىلىق تابىس تىلەپ، وقىرماندار اتىنان سىي- سياپات كورسەتتى.