قازاقستاندىق تانىمال تەلەجۇرگىزۋشى ومىردەن ءوتتى
بۇل تۋرالى الەۋمەتتىك جەلىدە اسىلحاننىڭ ارىپتەستەرى جازۋدا دەپ حابارلايدى NUR. KZ.
«قازاقستان» ارناسىندا سپورت جاڭالىقتارىن جۇرگىزگەن اسىلحان وسىدان بىرنەشە جىل بۇرىن اۋىر دەرتكە شالدىققان بولاتىن.
«ەكى كۇن بۇرىن ايدوس اعام ەكەۋمىز كوڭىلىن اۋلاپ، ۇيىنە كىرىپ شىققانبىز. جارتى ساعاتتاي جانىندا وتىردىق. سىرقات جانىن جەگىدەي جەپ جاتىر، بىلدىرتكىسى كەلمەدى. تەرەڭ كۇرسىندى دە، كوڭىلدەنگەن كەيىن تانىتىپ، «ينشا اللا، ورازاعا دا از قالىپتى عوي» دەدى. كەتەر تۇستا، «ءجيى كەلىپ تۇرىڭدارشى» دەدى. ءبىزدى كوزىنىڭ قيىعىمەن، ءبىر ۇلكەن قيماستىقپەن شىعارىپ سالعانداي بولدى. سول كۇنى اسىل باۋىرىمىزدىڭ اق ءجۇزىن بۇل جالعاندا ەڭ سوڭعى رەت كورۋىمىز ەكەن. كوكىرەك وكسيدى، ىشتەي تىناسىڭ»، - دەپ جازادى تانىمال ديكتور مەيىرجان الىبەك ۇلى.
«وسى ساپار ەستەن كەتپەيدى. بۇل كۇنى سەن اتى جامان دەرتكە شالدىققانىڭدى بىلمەيتىنسىڭ... ءبىز سەنى ەمحانادان الىپ كەتتىك. اناليزدى اسىعىس تاپسىردىڭ دا بىزگە ىلەسىپ كەتە باردىڭ. سەن دە ءبىز دە جەڭىل- جەلپى سىرقات شىعار دەپ ويلادىق. بارشىننىڭ بويىندا ەكى كۇن تويلادىق. قارماق سالىپ، بالىق اۋلادىق. جاقسى دەمالىس بولدى. نۇربەك بەكباۋ ەكەۋىڭ الىسىپ ويناعان ساتتەرىڭ دە كوز الدىمدا... اياعىنا «زاتسەپ» وراپ لاقتىرعالى جاتقانىڭدا وسىنداي بالۋان جىگىت قالايشا اۋىرۋشاڭ بولادى دەپ تاڭعالعانمىن. ءبىراق دەرت دەگەنىن قىلادى ەكەن. سول ساپاردان سوڭ سەن نۇربەكپەن ەمەس اۋرۋمەن كۇرەسىپ كەتتىڭ. ماسكەۋگە دەيىن بارىپ ەمدەلدىڭ، ۇزاق ۋاقىت الىستىڭ. اناجولى «ايەل باقىتى» حابارىندا اۋرۋدى جەڭگەن ادام رەتىندە سۇحبات بەرىپ وتىرعانىڭدى كورىپ قۋانىپ ەدىم، ارتىنشا اۋرۋحاناعا قايتا تۇسكەنىڭدى ەستىپ ۋايىمداپ قالدىق. ەندى مىنە تاڭ اتپاستان نۇربەكتەن سۋىت حابار جەتتى. سەن كەتىپسىڭ... قاجىلىققا ءبىر بارۋ ارمانىڭ ەدى، ول دا بۇيىرمادى. ءدىني باسقارمانىڭ ماعان بەرگەن سەرتيفيكاتىن شىن نيەتىممەن-اق وزىڭە سىيلاپ ەدىم، الايدا ول دا بەلگىسىز سەبەپپەن سيىرقۇيمىشاقتانىپ كەتتى. بىردە حات الماسقان ساتىمىزدە «بەرىلمە، سوققىلاي-سوققىلاي اۋرۋ دا دىڭكەلەيتىن شىعار»، - دەگەن مەنىڭ قايراۋىما «سول بالەنىڭ سوققىسى جامان، نوكداۋنعا جىبەرەدى، ەستى اۋدارادى»، - دەگەن بولاتىنسىڭ... اقىرى جەڭىپتى. باقۇل بول اسىلحان! سەن كورمەگەن قىزىق ارتىڭدا قالعان ۇل-قىزىڭا بۇيىرسىن!»، - دەپ جازادى جۋرناليست ەسبولات ايدابوسىن.