م. جولداسبەكوۆ اقىن و. سۇلەيمەنوۆتىڭ عىلىمي ەرلىگىن اتادى
بۇل پىكىردى بۇگىن ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە ءوتىپ جاتقان اقىن ولجاس سۇلەيمەنوۆتىڭ 80 جاسقا تولۋىنا ارنالعان «الەم ادامى» اتتى فورۋمدا مەملەكەت جانە قوعام قايراتكەرى مىرزاتاي جولداسبەكوۆ ءبىلدىردى.
«ولجاس سۇلەيمەنوۆ ازاماتتىق، ادامزاتتىق پوەزيانى عانا جاساۋشى ەمەس، تاپقىر، ءدالمار، شەشەن عانا ەمەس، تەرەڭ زەرتتەۋشى، حاس زەرتتەۋشى، زامانىمىزدىڭ عۇلاماسى. ونىڭ «1001» ءسوز اتتى ايتۋلى زەرتتەۋىنەن باستاپ، اتا- بابامىزدىڭ ءتۇپ تامىرىنان باستاپ تەرەڭ زەرتتەپ، تەرەڭ ءۇڭىلىپ جازعان تاريحي ەڭبەكتەرىنە ءبىزدىڭ عالىمدارىمىزدىڭ ءالى ءتىسى باتا قويعان جوق. جاپ- جاس ولجاستىڭ ورىس تاريحى جونىندەگى تەرەڭ زەرتتەۋلەرىنە، وزىنە دەيىنگى عالىمداردىڭ ايتا الماعانىن ايتقانىنا، ءسويتىپ ورىس عالىمدارىن ءپۇشايمان قىلعانىنا، تىڭ ويلارىمەن ءداۋىردى ءدۇر سىلكىندىرگەن تالانتىنا ءالى كۇنگە دەيىن تاڭدانىپ جۇرەمىن»، - دەدى م. جولداسبەكوۆ.
سونىمەن قاتار ول و. سۇلەيمەنوۆتىڭ ەڭبەكتەرى ورىستىڭ مەن- مەن دەگەن اكادەميكتەرىنىڭ ويىن ويران، باسىن دال قىلعاندىعىن اتاپ ءوتتى.
«عىلىمداعى ەرلىك دەپ مىنە وسىنى ايتادى. ولجاستىڭ ءبىر اۋىز سوزىنە تاتىمايتىن، بىردەڭە جازعانسىپ، عىلىم دوكتورى، پالەننىڭ اكادەميگى، تۇگەننىڭ اكادەميگىمىن دەپ جۇرگەن ادامدار بىزدەردە جەتەدى. مەن بۇل اتاقتاردى ەشكىمنەن دە قىزعانبايمىن. ءبىراق، ادىلەتسىزدىگى سول، ءبىزدىڭ كوپتەگەن عالىمدار عالىم دەگەن اتاقتى ءوزىنىڭ بيىك دارەجەسىندە ۇستاي الماي ءجۇر»، - دەدى ول.
اۆتور: مارلان جيەمباي