كارىم ءماسىموۆ جەر رەفورماسى جونىندەگى كوميسسيانىڭ جۇمىسىن جاريالاۋدى قامتاماسىز ەتۋدى تاپسىردى
بۇگىن ق ر پرەمەر- ءمينيسترى كارىم ءماسىموۆتىڭ توراعالىعىمەن وتكەن ۇكىمەتتىڭ كەزەكتى وتىرىسىندا جەر رەفورماسى بويىنشا كوميسسيا قۇرۋ تۋرالى مەملەكەت باسشىسى نۇرسۇلتان نازاربايەۆتىڭ تاپسىرماسىن ىسكە اسىرۋ بارىسى قارالدى.
اتالعان ماسەلە بويىنشا ق ر پرەمەر- ءمينيسترىنىڭ ءبىرىنشى ورىنباسارى - كوميسسيا جەتەكشىسى باقىتجان ساعىنتايەۆ باياندادى.
كوميسسيا قۇرامىنا پارلامەنت ءماجىلىسى مەن سەناتىنىڭ دەپۋتاتتارى، ۇكىمەت مۇشەلەرى، ساياسي پارتيالاردىڭ، اگروبيزنەستىڭ، سالالىق قاۋىمداستىقتاردىڭ وكىلدەرى، عالىمدار جانە ازاماتتىق بەلسەندىلەر كىرەدى.
سونىمەن قاتار، وڭىرلەردى دە كوپتەپ قامتۋ ءۇشىن كوميسسيا جۇمىسىنا قوعامدىق كەڭەستەر دە تارتىلاتىن بولادى.
سونداي-اق، وتىرىستا كوميسسيا جۇمىسىن ۇيىمداستىرۋ ماسەلەسى بويىنشا ق ر اۋىل شارۋاشىلىعى ءمينيسترى اسقار مىرزاحمەتوۆ پەن قر اقپارات جانە كوممۋنيكاتسيالار ءمينيسترى داۋرەن ابايەۆتىڭ حابارلامالارى تىڭدالدى.
كوميسسيانىڭ ساياسي پارتيالارمەن، قوعامدىق ۇيىمدارمەن جانە وڭىرلەرمەن ءوزارا ءىس-قيمىلى تۋرالى «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل- مۇحاممەد، كوميسسيا جۇمىسىنداعى ۇلتتىق كاسىپكەرلەر پالاتاسىنىڭ ءرولى تۋرالى «اتامەكەن» ۇكپ باسقارما ءتوراعاسى ابىلاي مىرزاحمەتوۆ ءسوز سويلەدى.
تالقىلاۋدى قورىتىندىلاي كەلە، كارىم ءماسىموۆ كوميسسيا جۇمىسىنىڭ ەلىمىز جۇرتشىلىعى ءۇشىن ماڭىزدىلىعىن اتاپ كورسەتتى. ۇكىمەت باسشىسى وسىعان بايلانىستى اقپارات جانە كوممۋنيكاتسيالار مينيسترلىگىنە كوميسسيا جۇمىسىنىڭ بۇقارالىق اقپارات قۇرالدارىندا جاريالانۋىن ۇيىمداستىرىپ، وڭىرلەردە ءتيىستى اقپاراتتىق جۇمىستاردى جۇرگىزۋدى تاپسىردى.