الماتىداعى ءدامحانانىڭ ورتەنۋ سەبەبى بەلگىلى بولدى

الماتى. قازاقپارات - الماتى قالالىق توتەنشە جاعدايلار جونىندەگى دەپارتامەنتى «كوروۆا بار» ءدامحاناسىنداعى ءورتتىڭ الدىن الا شىعۋ سەبەبىن ءمالىم ەتتى.

اتالعان ۆەدومستۆانىڭ باسپا ءسوز قىزمەتىنىڭ حابارلاۋىنشا، ءورتتىڭ شىعۋ سەبەپتەرىنىڭ ءبىرى رەتىندە ەلەكتر سىمىنىڭ قىسقا تۇيىقتالۋى قاراستىرىلىپ جاتىر. وسىدان كەيىن جارىلىس بولعان. بۇل جەردە گاز باللونى ەمەس، وندىرىستىك كونديتسيونەردەگى فرەون جارىلعان بولۋى مۇمكىن. ويتكەنى، دەپارتامەنت قىزمەتكەرلەرى اتاپ كورسەتكەندەي، ءورت ءسوندىرۋ بارىسىندا گاز باللونى تابىلماعان.

ءورتتىڭ شىعۋ سەبەپتەرى ءالى انىقتالۋ ۇستىندە. ايتا كەتەلىك، 10 -مامىرعا قاراعان ءتۇنى، تاڭعى ساعات 04:37 دە ابىلاي حان كوشەسى 121 ا مەكەنجايىندا ورنالاسقان «كوروۆا بار» ءدامحاناسىنان ءورت شىققان بولاتىن.

ءورت ءسوندىرۋ بارىسىندا بارلىعى 7 ادام قۇتقارىلىپ، 120 ادام ەۆاكۋاتسيالاندى. ولاردىڭ ىشىندە ءۇش بالا بار. ءبىر ادام ۋىتتى گازعا ۋلانۋ نىشانىمەن اۋرۋحاناعا جاتقىزىلدى. باسقالاي زارداپ شەككەندەر مەن قۇربان بولعاندار جوق. ءتىلسىز جاۋدى جويۋعا ءورت ءسوندىرۋ قىزمەتىنىڭ جەكە قۇرامىنان 115 ادام مەن 21 ارنايى تەحنيكا، سونداي-اق، جەرگىلىكتى پوليتسيا قىزمەتكەرلەرى، جەدەل مەديتسينالىق جاردەم دارىگەرلەرى، كوممۋنالدىق قىزمەتتەردىڭ قىزمەتكەرلەرى جۇمىلدىرىلدى.

ءورت تاڭعى ساعات 05:52 دە اۋىزدىقتالىپ، 06 ساعات 36 مينۋتتا تولىعىمەن ءسوندىرىلدى. ءورتتىڭ جالپى اۋماعى - 1100 شارشى مەتردى قۇرادى. سول كۇنى كۇندىز وقيعا ورنىندا قالا اكىمى باۋىرجان بايبەك بولىپ، كافەنىڭ مەنشىك يەلەرىنە تۇرعىن ۇيلەردىڭ زاقىمدالعان پاتەرلەرىن ءۇش كۇن ىشىندە قالپىنا كەلتىرۋدە تاپسىردى.

اۆتور: ايبوتا جاپپاربەرگەن