ن. نازاربايەۆ ۆ. ماتۆيەنكونى «دوستىق» وردەنىمەن ماراپاتتادى
17:38, 11 - مامىر 2016
استانا. قازاقپارات - ەلباسى نۇرسۇلتان نازاربايەۆ ر ف فەدەرالدىق جينالىسى فەدەراتسيا كەڭەسىنىڭ ءتورايىمى ۆالەنتينا ماتۆيەنكومەن كەزدەستى.
بۇل تۋرالى اقوردانىڭ باسپا ءسوز قىزمەتىنەن حابارلادى.
كەزدەسۋ بارىسىندا ەكى ەلدىڭ ءوزارا ىنتىماقتاستىعى، ونىڭ ىشىندە پارلامەنتارالىق سالاداعى ارەكەتتەردى نىعايتۋ ماسەلەلەرى تالقىلاندى.
نۇرسۇلتان نازاربايەۆ قازاقستان مەن رەسەي اراسىنداعى ىنتىماقتاستىقتىڭ كوپ قىرلى سيپاتىنا توقتالىپ ءوتتى، ونىڭ نەگىزگى قۇجاتى XXI عاسىرداعى تاتۋ كورشىلىك پەن وداقتاستىق تۋرالى شارت بولىپ تابىلادى، بۇل ەۋرازيالىق ەكونوميكالىق وداق قۇرۋ تۋرالى شەشىمدى قابىلداۋعا ىقپال ەتتى.
كەزدەسۋ بارىسىندا مەملەكەت باسشىسى ۆ. ماتۆيەنكوعا قازاقستان مەن رەسەي اراسىنداعى دوستىق مەن ىنتىماقتاستىقتى دامىتۋعا قوسقان ۇلەسى ءۇشىن Ⅱ دارەجەلى «دوستىق» وردەنىمەن ماراپاتتادى.