گەرمانيادا قىمىز كۇنى اتالىپ ءوتتى
اسا پايدالى سۋسىنمەن ءشول باسقان جەرگىلىكتى تۇرعىندار قازاقتىڭ ۇلتتىق تاعامىنان دا اۋىز ءتيدى، كۇمبىرلەگەن كۇي دە تىڭداپ قايتتى. كۇمبىرلەگەن قاسيەتتى دومبىرانىڭ قوڭىر ءۇنى، ۇلتتىق ءبي، ويىن وسىنىڭ بارلىعى قازاقستانداعىداي كورىنەدى. گەرمانيادا وتكەن قىمىز مەرەكەسىنە قازاق تا، نەمىس تە، ءتىپتى گەرمانيانى پانالاعان جاندار دا كەلگەن.
فرانكفۋرت تۇرعىنى كريستيانە ەلفنەر، مەن ءۇشىن تانىمدى دا قىزىق فەستيۆال بولدى. ەۋروپا ەلىندە قازاقتىڭ ۇلتتىق سۋسىنىنان اۋىز تيىگىسى كەلەتىندەر كوپ، دەدى.
«مۇندا 1997-جىلى قازاقستاننان كوشىپ كەلگەن ەدىك. وسى كەزگە دەيىن شىققان جەرىمىزدى ۇمىتقانىمىز جوق. قازاقستاندى ەسكە العاندا باۋىرلارىمىزبەن ءوزارا قازاقشا سويلەسەمىز. ەتتى دە ۇمىتقانىمىز جوق. رەتى كەلسە، ەت اسىپ جەپ، شۇيىركەلەسىپ اڭگىمە-دۇكەن قۇرامىز. مەن - وسى مەرەكەنىڭ تۇراقتى قاتىسۋشىلارىنىڭ ءبىرىمىز. بۇگىن دە قىمىز ءىشۋ ءۇشىن 170 شاقىرىمدى ارتقا تاستاپ كەلدىك»، دەيدى قازاقستاننان قونىس اۋدارعان ۆالدەمار ادام.
ماينداعى فرانكفۋرت قالاسىنىڭ تۇرعىندارى جىلىنا ەكى رەت قىمىز كۇنىندە وسى جەرگە جينالادى. سۋسىننىڭ ءدامى بىزدىكىنەن وزگەشەلەۋ. ارنايى تەحنولوگيامەن دايىندالادى. گەرمانيادا ەڭ ءىرى جىلقى فەرماسى وسى تسولمانداردا بار. قازاقتىڭ ۇلتتىق سۋسىنىن 1959-جىلى تسولماننىڭ اكەسى رۋدولف الىپ كەلگەن.
«جىل سايىن قوجالىقتا قىمىز فەستيۆالىن وتكىزەمىز. ءارى گەرمانيا بويىنشا مۇنداي ارناۋلى مەرەكەنى ءبىز عانا جاسايمىز. سەبەبى، اسا پايدالى سۋسىندى ەۋروپالىقتار دا ءسۇيسىنىپ ىشەدى. ءبىر جاعىنان حالىقتىڭ كوڭىل-كۇيى كوتەرىلىپ، جانىنا ءدارۋ بولاتىن استان اۋىز تيەدى. سوندىقتان وسىنداي يگى شارا ۇيىمداستىراتىنىمىزعا ءوزىمىز دە قۋانامىز ءارى ماقتانامىز»، دەيدى شارۋاشىلىق يەسى گۋدرۋن تسولمان.