باتىس ەۋروپا - باتىس قىتاي ءدالىزى ناتيجە بەرە باستادى
بۇل تۋرالى بۇگىن استانادا قازاقستان پارلامەنتى سەناتى مەن رەسەي فەدەراتسيا كەڭەسىنىڭ اراسىنداعى ىنتىماقتاستىق جونىندەگى كوميسسيانىڭ سەگىزىنشى وتىرىسىندا ق ر ينۆەستيتسيالار جانە دامۋ ءبىرىنشى ۆيتسە-مينيسترى جەڭىس قاسىمبەك ءمالىم ەتتى.
«بۇگىندە ءبىز «باتىس ەۋروپا - باتىس قىتاي» حالىقارالىق اۆتوموبيل ءدالىزى بويىنشا العاشقى ناتيجەلەردى كورىپ وتىرمىز. اتاپ ايتقاندا، قازاقستان ارقىلى تاۋار اينالىمى، جۇك اينالىمى، ترافيك كولەمى ارتتى، وسى رەتتە قىتاي جاعىنان، سونىمەن قاتار ورتالىق ازيادان رەسەيگە قاراي تاسىمال ەكى ەسەگە ءوستى. بۇل ءدالىز بويىنشا جۇك تاسىمالىن 30 ميلليون توننادان استام دەڭگەيدە بايقاپ وتىرمىز. وسى كورسەتكىشتەر قازاقستان ىشىندەگى ەلىمىزدىڭ جۇك تاسىمالى ەمەس، ياعني بۇل يمپورت-ەكسپورت جانە ترانزيت بولىپ تابىلادى. بۇل جوبانىڭ الەۋەتى جوعارى ەكەنىن كورىپ وتىرمىز»، - دەدى ۆيتسە-مينيستر.
ايتا كەتەيىك، قازاقستان مەن رەسەي اراسىنداعى ىنتىماقتاستىق اياسىندا بۇل - ءىرى ينتەگراتسيالىق جوبالاردىڭ ءبىرى. قىتايداعى ليانيۋنگان پورتىنان سانكت-پەتەربورعا دەيىنگى ءدالىز 8 مىڭ 400 شاقىرىمعا جۋىق. وسى رەتتە قازاقستان ارقىلى 2 مىڭ 787 شاقىرىم وتەدى. بۇگىندە قازاقستان ارقىلى وتەتىن نەگىزگى جول قۇرىلىستارى اياقتالدى.
اۆتور: رۋسلان عابباسوۆ