استانادا «وتان قورعاۋشىلار» مونۋمەنتىنە گۇل شوقتارىن قويۋ سالتاناتى ءوتتى - فوتو
بۇگىن استانادا «وتان قورعاۋشىلار» مونۋمەنتىنە داڭق گۇل شوقتارىن قويۋدىڭ سالتاناتتى شاراسى بولىپ ءوتتى. سالتاناتتى شاراعا ق ر پارلامەنتى سەناتىنىڭ ءتوراعاسى قاسىم-جومارت توقايەۆ، پارلامەنت ءماجىلىسىنىڭ ءتوراعاسى باقتىقوجا ىزمۇحامبەتوۆ، ق ر مەملەكەتتىك حاتشىسى گۇلشارا ءابدىقالىقوۆا، ق ر پرەمەر- ءمينيسترى كارىم ءماسىموۆ، ق ر قورعانىس ءمينيسترى يمانعالي تاسماعامبەتوۆ جانە باسقا دا مەملەكەتتىك ورگان باسشىلارى، سوعىس ارداگەرلەرى مەن تىل ەڭبەككەرلەرى قاتىستى.
شاراعا سونىمەن قاتار، ۇلى وتان سوعىسىندا قازا تاپقان قازاقستاندىقتاردى ەسكە الۋ ءۇشىن استانا تۇرعىندارى، ەلوردا قوناقتارى دا قاتىستى. ولاردىڭ اراسىندا قۇرمەتتى قوناق رەتىندە ۇلى وتان سوعىسىنىڭ 45 ارداگەرى دە بولدى. ايتا كەتەرلىگى، جىل وتكەن سايىن ەلىمىزدە سوعىسقا قاتىسقان، تىل ەڭبەگىمەن جەڭىستى جاقىنداتقان ارداگەرلەر قاتارى ازايىپ بارادى. سوندىقتان دا، قالىڭ جۇرتشىلىق، اسىرەسە جاستار قاھارمان ارداگەرلەردىڭ دەنىنە ساۋلىق تىلەپ، ولاردىڭ ەرلىگىنە ءتانتى ەكەنىن جەتكىزدى.
استاناداعى «وتان قورعاۋشىلار» ەسكەرتكىشى جانىنداعى سالتاناتتى شارا بارىسىندا حالىق ماڭگىلىك الاۋعا گۇل شوقتارىن قويىپ، ەرلىكپەن ەلىن قورعاعان ەرەندەردى ءبىر مينۋت ەسكە الدى.
ايتا كەتەرلىگى، ۇ و س جەڭىسىنىڭ 71 جىلدىعىن مەرەكەلەۋ قارساڭىندا جەرگىلىكتى اتقارۋشى ورگاندار ارداگەرلەردى قولداۋ، ولارعا قۇرمەت كورسەتۋ شارالارىنىڭ اۋقىمدى جوسپارىن ىسكە اسىرۋدا. 2016 -جىلعا ارنالعان جەرگىلىكتى بيۋدجەتتە ارداگەرلەرگە ءبىرجولعى ماتەريالدىق كومەك كورسەتۋ ءۇشىن 2,6 ميلليارد تەڭگە قاراستىرىلعان.
ايتا كەتەرلىگى، استانادا ءدال قازىر تاۋەلسىزدىك داڭعىلىنىڭ بويىنداعى «Astana Mall» ساۋدا ويىنساۋىق ورتالىعى جانىندا جەڭىس كۇنىنە ارنالعان «ماڭگىلىك پولك» شەرۋى باستالدى. ءىس- شارا سوڭىندا قاتىسۋشىلار وتان قورعاۋشى الاڭىندا گۇل شوقتارىن قويادى. سونىمەن قاتار، بۇگىن «استانا وپەرا» تەاترىندا «كوك ورامال» مەرەكەلىك كونسەرتى وتەتىنى جوسپارلانعان. استانا قالاسىنىڭ تۇرعىندارى مەن قوناقتارى سونداي-اق ساعات 18:00 دە «استانا وپەرا» تەاترىنىڭ ۇلكەن زالىندا ارام حاچاتۋرياننىڭ «سپارتاك» اتتى بالەتىن تاماشالاي الادى.
اۆتور: قانات مامەتقازى ۇلى