قازاقستان مەن تۇركيانىڭ اراسى تۋريزمسىز-اق بەرىك بولادى - ش. ءالي - فوتو

استانا. قازاقپارات - جىل ون ەكى اي بويى ءتورت تەڭىزدىڭ اۋاسىمەن تىنىستايتىن تۇرىك حالقى تۋريزم دەگەن سالانىڭ تۇگىن قالدىرماي يگەرگەن حالىق. ال، بيىل تۋريزم قاتتى دامىعان ايماق، جەرورتا تەڭىزىنىڭ جاعاسىنداعى انتاليا قالاسى ۇلكەن باققا اينالدى.

بۇعان دەيىن حابارلاعانىمىزداي، ءساۋىردىڭ سوڭىندا انتاليا قالاسىندا «بالالار مەن گۇلدەر» تاقىربىنداعى «ەكسپو» -2016 كورمەسى اشىلعان بولاتىن.

جالپى، كورمەگە بارلىعى 56 مەملەكەت پەن 30 حالىقارالىق ۇيىم قاتىسىپ وتىر. كورمەنىڭ اۋماعى - 112 شارشى مەتر.

كورمەنى ارالاعان كەزدە تۇركياداعى ءىرى تۋريستىك فيرما - FBB كومپانياسىنىڭ وكىلى شاميل اليمەن كورمە جايلى جانە تۇركياداعى تۋريزمنىڭ قازىرگى قارقىنى جايلى اڭگىمەلەسكەن ەدىك.

«مەملەكەتتەردىڭ بارلىعى پاۆيلوندارىندا بوتانيكا سالاسىنداعى جەتىستىكتەرى مەن ادامزاتتىڭ بولاشاعى - بالالاردىڭ ارمان تىلەگىن كورسەتۋگە تىرىسقان. ال، انتاليا قالاسىنىڭ ءوزى كورمەگە ەكى جىلداي دايىندالدى. قالانىڭ شەتىندەگى كورمەگە اپاراتىن جول مەن جاڭا كوپىرلەر ەكى ايدا سالىنسا، كورمە مەن قالانى جالعايتىن ترامۆاي جەلىسى جۋىردا عانا ىسكە قوسىلدى»، - دەيدى شاميل.

شاميل ءالي تەك تۇركيادا عانا ەمەس، وزگە دە تۋريستىك ەلدەردە كوپ جىلدان بەرى جۇمىس ىستەگەن وسى سالانىڭ ءبىلىمدى ساراپشىسى. ول قازاقستانعا دا ءجيى كەلىپ تۇرادى ەكەن. «استانا - ءوزىنىڭ ءبىر ەرەكشەلىگى، سۇلۋلىعى بار قالا، ءبىراق ماعان الماتىدان اسقان ادەمى قالا جوق» دەپ قالجىڭدادى ءسوز اراسىندا ول.

«جالپى، تۋريزم ءبىر جىلدا ناتيجەسىن بەرە قوياتىن سالا ەمەس. ءبىز مىسالى، 1978 -جىلدان بەرى وسى سالانى ناقتى كاسىپ قىلىپ كەلەمىز. ءبىراق، سەرۆيسى دامىعان، تۋريستەر مول كەلەتىن مەملەكەتكە اينالساق تا، ءالى دە ۇيرەنىپ جاتىرمىز. ءتۋريزمدى دامىتۋدىڭ باستى ءبىر تالابى - ينفراقۇرىلىم. قازاقستاندا شىرايلى مەكەندەر مول- اق، ءبىراق، ولاردىڭ ينفراقۇرىلىمىن دامىتقان سوڭ عانا تۋريستەر كوبەيەدى. سەبەبى، تۋريست، ياعني دەم الۋشىنىڭ ءبىرىنشى سۇرانىسى - كومفورت، ياعني جايلىلىق»، - دەيدى ش. ءالي.

ءبىر ايتا كەتەرلىگى، بيىل تۇركيا ەلىنە يراننىڭ تۋريستەرى كوپ كەلىپ جاتىر ەكەن. شاميلدىڭ ايتۋىنشا، ۇزاق جىلداردان بەرگى سانكتسيالاردان سوڭ الەم ەلدەرىمەن قايتا كەلىسسوز جۇرگىزە باستاعان يران مەملەكەتىنىڭ حالقى ءۇشىن ءدال قازىر تۇركيا ەڭ جاقىن، ەڭ قولجەتىمدى تۋريستىك ورتا.

«بۇرىن يراننان بىرەن- ساران عانا تۋريست كەلەتىن. ءقازىر، دەمالۋعا كەلەتىن يران ازاماتتارى كوبەيدى. سەبەبى، ولاردىڭ تالاپتارىنا، ولاردىڭ سالت- ءداستۇرى مەن وزگە دە سۇرانىستارىنا ەڭ جاقىنى - تۇركيا. بيىل يراننان 2 - 2,5 ميلليون تۋريست كەلەدى دەپ كۇتىپ وتىرمىز»، - دەگەن جاڭالىق جەتكىزدى ول.

«ال، قازاق حالقى تۇركيانىڭ باۋىرى، ءتۋريزمسىز- اق بۇل ەكى حالىقتىڭ دوستىعى نىعايا بەرەدى»، - دەيدى شاميل. «قازاقستاننان كەلەتىن ءتۋريستىڭ ءارقايسىسى ءبىزدىڭ قۇرمەتتى قوناعىمىز. بىلتىر تۇركياعا 250 مىڭنان اسا قازاقستاندىق كەلىپ دەمالعان ەكەن. بيىل دا سولاي بولادى دەپ جوسپارلاپ وتىرمىز. قازاق حالقى تۇركيانىڭ باۋىرى، ءتۋريزمسىز- اق بۇل ەكى حالىقتىڭ دوستىعى نىعايا بەرەدى»، - دەپ قايتالادى ول.

جالپى، بيىل تۇركيانىڭ تۋريستىك اگەنتتىكتەرى تمد ەلدەرىنە كوپ نازار سالماق ەكەن. وسى ورايدا، ش. ءالي رەسەي مەن تۇركيا اراسىنداعى قارىم- قاتىناس جايلى ايتا كەلە: «بىلتىر اقپان ايىندا رەسەيدەن وزدەرىڭىز سياقتى جۋرناليستەر كەلىپ، ءبىزدىڭ تۋريزم تۋرالى ماتەريال دايىنداپتى. اقپان ايىن - دەمالىس ماۋسىمى، ول كەزدە جاعادايلاردا تۋريست تە، جۇمىسشى دا بولمايدى. ونى بۇرىننان بىلەمىز. ءبىراق، رەسەيدىڭ بۇقارالىق اقپارات قۇرالدارى «تۇركيانىڭ جاعاجايلارى بوساپ قالدى» دەگەن جالعان اقپارات تاراتىپتى. ارينە، ەكى ەلدىڭ اراسىندا ءبىر ينتسيدەنت بولدى، ءبىراق جالعان اقپارات تاراتۋ دۇرىس ەمەس قوي. ءساۋىر ايى دەمالىس ماۋسىمى ەندى باستالاتىن كەز، ءبىراق، وزدەرىڭىز كورىپ تۇرسىزدار، جاعاجايلارىمىزدا تۋريستەر قازىردەن اق قاپتاپ كەتكەن. ياعني، رەسەيدەن تۋريستەر كەلمەسە، تۇركيانىڭ ءتۋريزمى اقساپ قالادى دەگەن ءسوز ەمەس. رەسەيمەن اراداعى بولعان جاعدايدان سوڭ تۇركيانىڭ ءتۋريزمى ۇزاسا 15 پايىزعا قۇلدىرايدى، بولماسا، ءتىپتى 10 پايىز. ءبىراق، مەنىڭ ايتارىم، تۋريستەر كەلمەسە كەلمەي- اق قويسىن، ءبىراق ەكى ەل اراسىنداعى قارىم- قاتىناس جاقسارسىن»، - دەگەن تىلەگىن ءبىلدىردى.

           

اۆتور: كەنجەكەي توقتامۇرات قىزى