دەنساۋلىق: جۇرەك نەدەن اينيدى؟

استانا. قازاقپارات - جۇرەك نەدەن اينيدى؟ بۇل سۇراققا جاۋاپ ىزدەۋدىڭ جولدارى كوپ. ءبىراق، نەدەن اينىعانىن تابۋ قيىنداۋ.

ادەتتە، جۇرەك مايلى تاعامداردان، ۋلانعاننان، الكوگولدى ىشىمدىكتەردى كوپ ىشكەننەن، كۇيزەلىستەن اينيدى. سونداي- اق، ايەلدەردىڭ جۇكتىلىك كەزىندە دە جۇرەك اينۋى قالىپتى جاعداي سانالادى.

جۇرەكتى اينىتاتىن جاعدايلار كوپ. سونىڭ ىشىندە ءسىز بىلە بەرمەيتىن، بولماسا سيرەك كەزدەسەتىن تۇرلەرى تۋرالى ايتا كەتكەندى ءجون ساناپ وتىرمىز.

مۋلتيدارۋمەندەر. بۇلار جايدان- جاي جۇرەكتى اينىتپايدى. ەگەر قالاي ءىشۋ ەرەجەسىن بىلمەسەڭىز، وندا جۇرەگىڭىز اينۋى مۇمكىن. ول ءۇشىن مۋلتيدارۋمەندەردى اش قارىنعا ىشۋگە بولمايتىنىن ەستە ۇستاعانىڭىز ابزال. تاماقتانىپ بولعان سوڭ عانا ءىشۋ كەرەك.

كوفەدەن باس تارتۋ. كۇندە كوفە ءىشىپ ءجۇرىپ، بىردەن ءىشۋدى توقتاتساڭىز، وندا جۇرەگىڭىز اينۋى مۇمكىن. ول ءۇشىن كوفەنى ازداپ ءىشىپ ءجۇرىپ توقتاتۋ كەرەك.

تەرلەۋ. ارىقتاۋ ءۇشىن، نەمەسە اۋرۋ- سىرقاۋ ءۇشىن كەيدە تەرلەۋگە كەڭەس بەرەمىز. ءبىراق، ادام تەرلەگەندە جۇرەگى اينۋى مۇمكىن. ونداي ساتتە ءبىر جۇتىم سۋ ىشكەن دۇرىس.

ەكسترەمالدى سپورت تۇرلەرىمەن شۇعىلدانعاندا دا جۇرەك اينۋى مۇمكىن. سونداي- اق، جۇرەك اينۋ تومەندەگىدەي بىرنەشە تۇرگە اجىراتىلادى:

ۋىتتىق - ءارتۇرلى ۋلارمەن، تاعام ونىمدەرىمەن، سونداي-اق ەندوگەندى ۋىتتارمەن ۋلانۋدان تۋىندايدى؛

ميعا قاتىستى - ونىڭ نەگىزىندە باس ميىنىڭ اۋرۋلارى جاتادى. ءىس جۇزىندە ءارقاشان ارتەريالىق جانە باس سۇيەكىشىلىك قىسىممەن بايلانىستى بولادى. مۇنداي جاعدايدا سەبەبى مي ىسىكتەرىنەن، اتەروسكلەروزدان، ديەنتسەفالدىق داعدارىستان، گيپەرتونيادان بولادى؛

مەتابوليكالىق - شامادان تىس تاماقتانۋدان، اشتىقتان، ديابەتتەن، گيپوۆيمامينوزدان، زاتتار الماسۋىنىڭ بۇزىلۋىنان تۋىندايدى؛

رەفلەكتورلىق - كەزبە جۇيكەلەردە بولاتىن رەتسەپتورلاردىڭ شامادان تىس تىتىركەنۋىمەن جانە شىرىشتى اسقازان- ىشەك جولىنىڭ قابىنۋىمەن بايلانىستى.

massaget.kz پورتالىنان الىندى.