ەۋرو وداقتا العاش رەت ءدىن جانە دىنگە سەنۋ ەركىندىگى جونىندەگى ارنايى ەلشى تاعايىندالدى
22:04, 06 - مامىر 2016
بريۋسسەل. قازاقپارات - ەۋروپالىق كوميسسيانىڭ پرەزيدەنتى جان-كلود يۋنكەر ە و اۋماعىنان تىس جەرلەردە ءدىن جانە دىنگە سەنۋ ەركىندىگىن ۇسىنۋ جونىندەگى ارنايى ەلشىنى تاعايىندادى.
بۇل تۋرالى ەۋروپالىق ساياساتكەر جۇما كۇنى ۆاتيكاندا ريم پاپاسى فرانسيسككە ۇلى كارل اتىنداعى سىيلىقتى تابىستاۋ راسىمىندە ءمالىم ەتتى.
بۇل قىزمەتكە 2004-2009 -جىلدارى ءبىلىم، وقىتۋ، مادەنيەت جانە جاستار ماسەلەلەرى جونىندەگى ەۋروكوميسسار بولعان سلوۆاكيالىق ساياساتكەر يان فيگەل تاعايىندالدى.
«ءدىن جانە دىنگە سەنۋ ەركىندىگى - ەۋروپالىق وداق ىرگەتاسىنىڭ ءبىر بولىگى بولىپ تابىلاتىن نەگىز قالاۋشى قۇقىق. ءدىني جانە ەتنيكالىق ازشىلىقتى ۇنەمى قۋدالاۋ ە و- نىڭ ىشىندە جانە سىرتىندا ودان دا جۇيەلى قورعاۋ مەن ەركىندىكتى ۇسىنۋدى تالاپ ەتىپ وتىر»، - دەپ اتاپ ءوتتى جان-كلود يۋنكەر.