كەڭسەگە بۇلاي كيىنبەڭىز - فوتو
قايدا بارماڭىز، ەتيكاعا ساي، سول باراتىن جەرىڭىزدىڭ قاجەتىنە قاراي كيىنۋ ماڭىزدى. جاتتىعۋ زالىنا بيىك وكشەلى اياقكيىم نە تار بەلدەمشەمەن بارمايسىز عوي. تۋرا سول سياقتى كەڭسەگە دە كيىنۋدىڭ ءوز نورمالارى مەن تالاپتارى بار.
ەندەشە، كەڭسەگە قالاي كيىنۋگە، نەنى كيۋگە بولمايتىنىن بىلەسىز بە؟
تىم قىسقا كيىمدەر
قىپ- قىسقا كويلەك پەن بەلدەمشەنى نە جامباسىڭىز «جىلتىلداپ» تۇراتىن تىم قىسقا شالباردى (شورتى) كەڭسەگە ەمەس، كەزدەسۋگە (قىزمەت بابىمەن ەمەس، ارينە!)، قىدىرۋعا كيىڭىز. ال كەڭسەگە تىزەڭىزدەن تومەن تۇسىرمەسەڭىز دە، ەتەگى ءسال عانا جوعارى بولاتىن كويلەكتەردى كيگەنىڭىز ءجون.
«جالاڭاش» كويلەكتەر
بۇل توپقا ارقاسى نەمەسە كەۋدە تۇسى تىم اشىق كيىمدەر جاتادى. ءتىپتى جاعا- جەڭىنىڭ ورنىندا جالعىز جىڭىشكە باۋمەن- اق ءىلىنىپ تۇرعان كيىم (كويلەك، توپ) تۇرلەرى دە كوپ. مۇنداي كيىمدەر كەڭسەدەگى ارىپتەستەرىڭىزدىڭ ويىن باسقا جاققا ءبولىپ، ولاردىڭ جۇمىس ىستەۋىنە كەدەرگى كەلتىرۋى مۇمكىن. سوندىقتان دا ول كەڭسە ادەبىنە جاتپايدى.
ەرەكشە ءساندى كيىمدەر
بويفرەند- دجينسىلار، قىسقا توپ، ءتۇرلى جىلتىراقتارمەن كومكەرىلگەن، جىرتىق- جاماۋلارى، جاپسىرمالارى بار ء«ساندى» كيىمدەردى كيەتىن ورىن - كەڭسە ەمەس. قىزمەت بابىمەن ءار جاستاعى ادامدارمەن سۇقباتتاس بولىپ، ءبىر جەردە جۇمىس ىستەيتىندىكتەن مۇنداي كيىممەن كەڭسەگە كىرۋ - كەڭسە ەتيكاسىن بۇزۋ عانا ەمەس، ۇلكەندەردى سىيلاماۋدىڭ دا ءبىر كورىنىسى. سوندىقتان مۇنى دا ەسكەرۋ قاجەت. ارينە، كەڭسەگە سانمەن كيىنۋگە ەشكىم شەك قويمايدى. ءبىراق شەكارانى ءبىلىپ، تالعاممەن بىرگە تالاپتى دا ەستەن شىعارماۋدى ويلاعان ءجون.
«گرانج» ستيلى
كيىمدەگى كولەمدى جازۋلار، ءتۇرلى سۋرەتتەر، جىرتىقتار مەن جاپسىرمالار، شامان كوپ جىلتىراقتار، سالپىلداعان باۋلار - مۇنىڭ بارلىعىنا كەڭسەدە تىيىم سالىنادى.
سونداي- اق بىلعارى شالبارلار، تور كيىمدەر (بلۋزكا، كويلەك، ءتىپتى كولگوتكي، چۋلكي)، سپورت كيىمدەرى، مايكا، گۇلدى- گۇلدى جەيدەلەر، تىرىسىپ، دەنەگە جابىسىپ تۇراتىن كيىمدەر، تاعىسىن تاعى.
كەڭسە - جۇمىس ورنى ەكەنىن ەستەن شىعارماۋ كەرەك. ادامدار بۇل جەرگە دەمالۋعا، نە كوڭىل كوتەرۋگە ەمەس، جۇمىس ىستەۋگە بارادى. سوندىقتان وندا قاتاڭ ءتارتىپ بولۋ كەرەك. ءتارتىپ بولعان جەردە عانا ءونىمدى ەڭبەك بولماق. كيىنەردەن بۇرىن قايدا بارعالى جاتقانىڭىزدى ەسىڭىزگە ءتۇسىرىپ الىڭىز!
دايىنداعان: قۇرالاي مۇرات قىزى
دەرەككوز: anabol.kz