جەردى ساتۋدان تۇسەتىن قارجى بيۋدجەتكە ەمەس، ۇلتتىق قورعا اۋدارىلادى
20:05, 01 - مامىر 2016
استانا. قازاقپارات - بۇگىنگى تاڭدا قوعامدا جەر كودەكسىنە ەنگىزىلىپ جاتقان وزگەرىستەر قىزۋ تالقىلانىپ جاتىر.
جۇرت اراسىندا «جەردى ساتۋ ارقىلى مەملەكەت بيۋدجەتتى تولىقتىرعىسى كەلە مە؟ » دەگەن الىپقاشپا اڭگىمەلەر دە تاراپ ءجۇر. وسىعان وراي جەر ماسەلەسىنە قاتىستى جالعان اقپاراتتىڭ الدىن الۋ ماقساتىندا وزەكتى ماسەلەلەردى ءتۇسىندىرىپ كەتۋ ماڭىزدى.
رەسىمي دەرەككوزدىڭ مالىمەتى بويىنشا، بىرىنشىدەن، اۋىل شارۋاشىلىعى ماقساتىندا قولدانىلاتىن جەردى ساتقاننان تۇسەتىن قارجى بيۋدجەتكە ەمەس، ۇلتتىق قورعا اۋدارىلادى.
ەكىنشىدەن، جەردى ساتۋ ارقىلى مەملەكەت ونداي كىرىس تابۋدى ماقسات ەتپەيدى. باستى يدەيا جەردى ەكونوميكالىق اينالىمعا تارتۋ.
ايتا كەتەيىك، بىردە- ءبىر شەتەلدىك قازاقستان جەرىنىڭ ءبىر سانتيمەترىن دە ساتىپ الا المايدى. تەك قازاقستاندىقتاردىڭ عانا اۋىل شارۋاشىلىعى ماقساتىنداعى جەرلەردى جەكەمەنشىككە قۇقىعى بار.