جەردى جالعا الىپ پايدالانۋ تاجىريبەسى بىزدە بۇرىننان بار - قاسقىرباي الىمبايەۆ
وسىعان وراي «قازاقپارات» ءتىلشىسى جەر ماسەلەسىنە بايلانىستى قىزىلوردا وبلىسى قازالى اۋدانى، «جالاڭتوس باتىر» اتىنداعى جاۋاپكەرشىلىگى شەكتەۋلى سەرىكتەستىگىنىڭ ديرەكتورى قاسقىرباي الىمبايەۆپەن جولىعىپ سۇحباتتاسقان ەدى.
- بۇگىنگى تاڭدا جەردىڭ ساتىلۋى مەن، جالعا بەرىلۋى جايىندا قوعام ومىرىندە قىزۋ تالقىلاۋ ءجۇرىپ جاتىر، وسى ورايداعى ءسىزدىڭ پىكىرىڭىز قانداي؟
- دۇرىس ايتاسىز، ەلدىڭ ورتاسىندا ءجۇرمىز، بۇگىنگى اعايىننىڭ الاڭداپ وتىرعان ماسەلەسى جەرگە قاتىستى بولىپ وتىر. الايدا، مەملەكەت باسشىسى جەردىڭ ەشقانداي دا شەتەلدىكتەرگە ساتىلمايتىنىن ايتتى عوي. سونىمەن بىرگە جەرگە بايلانىستى ەلدىڭ جانايقايىنا «ءبىزدىڭ ەل بۇل جەردى قاسىق قانى قالعانشا قورعايتىنىنا سەنەمىن» دەپ ازاماتتىق پوزيتسياسىن دا بايقاتتى. وسىدان كەيىن كوپشىلىكتىڭ تولقۋى ءبىرشاما سايابىرسىدى دەۋگە بولادى. ويتكەنى وسى ەلدىڭ مۇددەسىن ءبىرىنشى ويلايتىن ادام ول ەلباسى دەپ بىلەمىن.
- دەي تۇرعانمەن، ءالى دە بولسا جەردى جالعا بەرۋ پروبلەماسى ايتىلىپ قالۋدا. بۇعان نە ايتار ەدىڭىز؟
- مەنىڭ ويىمشا، جەر ءبىرىنشى كەزەكتە حالىققا پايدا اكەلۋى كەرەك. ال پايدالانىلماي، ازىپ- توزىپ جاتقان جەردى جالعا بەرۋ ماسەلەسى سونشالىقتى قورقىنىشتى دەپ ويلامايمىن. اۋىل شارۋاشىلىق جەرى بەرىلگەنىمەن ول بەلگىلى ءبىر مەرزىمگە عانا بەرىلەدى. سوسىن ونىڭ استىنداعى قازبا بايلىق بولسا، ول مەملەكەتتىكى بولىپ قالا بەرەدى. جەر پايدالانىلسا، ەلگە جۇمىس بولادى. ۇكىمەتتىڭ بۇل قادامى ۋاقىت تۋدىرىپ وتىرعان قاجەتتىلىك دەپ ەسەپتەيمىن. بارلىعى زاڭدىق تۇرعىدان شەشىلسە، قاداعالاۋدا بولسا بۇل مۇمكىندىكتى پايدالانۋعا بولادى. بۇگىندە تورتكۇل دۇنيە تانيتىن قازاقستانعا الەمدىك قاۋىمداستىق كوز تىگىپ وتىر. بىزدەگى ءاربىر وزگەرىس الەمنىڭ نازارىندا تۇر. دەمەك، ءار ىستە «جەتى ولشەپ، ءبىر كەسىپ» تاۋەكەل جاساۋعا بولادى.
- ءوزىڭىز باسقارىپ وتىرعان سەرىكتەستىكتىڭ جەرىن دە جالعا الىپ وتىرسىز، ونىڭ پايدالى جاعى بار ما؟
- ءبىز جەردى مەملەكەتتەن 49 جىلعا جالعا الىپ، 15 - ىلدان بەرى پايدالانىپ كەلەمىز. شارۋاشىلىقتا 100 دەن استام ادام ەڭبەك ەتەدى. جالعا العان سوڭ وسى جەرگە جاۋاپتى بولىپ، قىزمەت اتقاراسىڭ. سۋ جۇيەلەرى بار، جەردى تەگىستەۋ دەيسىز بە، جاۋاپكەرشىلىگى بىزدەن سۇرالادى. ياعني، جەردىڭ يەسى بار. جەردەن ءناپاقاسىن ايىرىپ وتىرعان ەل دە ءوز جۇمىسىنا جاۋاپكەرشىلىكپەن قارايدى. سونىمەن قاتار، جەردى ءتيىمدى پايدالانۋىمىز قاداعالاۋدا بولادى. جالپى ايتار بولسام، جەردى جالعا الىپ پايدالانۋ تاجىريبەسى بىزدە بۇرىننان بار.
اۆتور: ەلۋباي اۋەزوۆ