قىتايلىق ءىرى كومپانيامەن بىرگە «قاز مۇناي گاز» بىرلەسكەن كاسىپورىن قۇردى
KMG International N. V. (بۇرىنعى Rompetrol Group) كومپانياسىنىڭ نەگىزىندە بىرىككەن كاسىپورىن قۇرۋ تۋرالى «قاز مۇناي گاز» ۇ ك ا ق جانە China CEFC Energy Company Limited كومپانياسىنىڭ اراسىندا قۇجاتتارعا قول قويۋ ءراسىمى 29- ساۋىردە بولدى.
باسپا ءسوز قىزمەتىنىڭ مالىمەتىنشە، ق م گ جانە CEFC كومپانياسىنىڭ جاڭادان قۇرىلىپ جاتقان بىرىككەن كاسىپورىنداعى ۇلەستىك قاتىناسى تيىسىنشە 49 جانە 51 پايىز بولادى. وسى ۋاعادالاستىق اياسىندا CEFC وزىنە ءبىرقاتار مىندەتتەمەلەر الدى، سوعان سايكەس ولار ەۋروپا جانە جىبەك جولى ەلدەرىنە ينۆەستيتسيا سالۋدى جۇزەگە اسىرادى.
«قازاقستاندىق ۇلتتىق مۇنايگاز وپەراتورى ق م گ ۇ ك پەن CEFC كومپانياسىنىڭ بىرىككەن جوباسى ق م گ ي توبىنىڭ نەگىزىندە داميدى جانە ول «Silk Way جوباسى» دەگەن اتقا يە بولدى. قازاقستان، قىتاي جانە رۋمىنيا ماماندارىنان جاساقتالعان جۇمىسشى توبى كوپتەگەن دايىندىق جۇمىستارىن جۇرگىزدى. ايتار بولساق، 2015-جىلدىڭ 14- جەلتوقسانىندا ءوزارا كەلىسىم تۋرالى مەموراندۋمعا قول قويىلدى، بيىل 29- قاڭتاردا تاراپتاردىڭ نەگىزگى شارتتارى (Therm Sheet) قازاقستان جانە قىتاي مەملەكەتتەرى پرەمەر-مينيسترلەرىنىڭ قاتىسۋىمەن كەلىسىلدى»، - دەلىنگەن باسپا ءسوز حابارلاماسىندا.
بىرىككەن كاسىپورىندى باسقارۋدى تەپە-تەڭدىك نەگىزدە جۇزەگە اسىرۋ جوسپارلانىپ وتىر. مامىلە 2016-جىلعى قازانعا قاراي اياقتالادى.
ق م گ ۇ ك باسشىسى ساۋات مىڭبايەۆ بيزنەستى دامىتۋ ءۇشىن بىرىككەن تۇعىر رەتىندە ق م گ ي- ءدى پايدالانا وتىرىپ، مىقتى ينۆەستورمەن وداقتاستىقتا كومپانيا ايتارلىقتاي العا جىلجي الاتىنىن ايتىپ وتىر. ءوز كەزەگىندە CEFC اتقارۋشى ديرەكتورى جان جيانجيۋن ق م گ جانە CEFC اراسىنداعى ارىپتەستىك بىرلەسكەن پلاتفورما قۇرۋعا جانە ەنەرگەتيكا سەكتورىنىڭ دامۋىنا باعىتتالعان ورتاق ماقساتتارعا نەگىزدەلگەنىن ايتىپ ءوتتى. «وسى ارىپتەستىك قىتاي ەلىنىڭ «ءبىر بەلدەۋ - ءبىر جول» جانە قازاقستاننىڭ «نۇرلى جول» باعدارلامالارىمەن ۇشتاسىپ جاتىر. بۇل ارىپتەستىكتىڭ ەكى تاراپقا دا ءتيىمدى بولاتىنىنا ءبىز سەنىمدىمىز»، - دەپ اتاپ ءوتتى ول.
ايتا كەتەيىك، CEFC كومپانياسى قىتايداعى بارىنشا قارقىندى دامىپ كەلە جاتقان جەكە كومپانيالاردىڭ ءبىرى. كومپانيا 2014-جىلى Global Fortune 500 تىزىمىنە ەنىپ، 349-ورىندى يەلەندى. CEFC ءوز قىزمەتىن وتىن، قارجى جانە ينۆەستيتسيا سالالارىندا ىسكە اسىرىپ كەلەدى.