جىنىسىن انىقتاۋ ماقساتىندا «التىن ادامنىڭ» سۇيەكتەرى دانيا مەملەكەتىنە جىبەرىلدى

استانا. قازاقپارات - «التىن ادامنىڭ» سۇيەكتەرىنىڭ ۇلگىسى دانيا مەملەكەتىنە ساراپتاماعا جىبەرىلدى.

بۇل تۋرالى Tengrinews.kz تىلشىسىنە «ەسىك» قورىق-مۋزەيىنىڭ ديرەكتورى گۇلميرا مۇحتاروۆا حابارلادى.

ونىڭ ايتۋىنشا، مۋزەي دانيا مەملەكەتىندەگى ماماندارمەن كەلىسىپ قويدى. ولار قازاقستاندا زەرتتەۋلەر جۇرگىزىپ، «التىن ادامنىڭ» سۇيەكتەرىنىڭ ۇلگىسىن د ن ق ساراپتاماسىنا الىپ كەتتى. «بىزدە ولارمەن بىرگە جۇمىس ىستەۋ تۋرالى كەلىسىمشارت بار، بارلىعى رەسمي تۇردە. (...) ساراپتاما «التىن ادامنىڭ» جىنىسىن، جاسىن، كىم بولعانىن، نەدەن قازا بولعانىن، ونىڭ تۇپكى اتا-تەگىن انىقتاۋ ءۇشىن جاسالىپ وتىر»، - دەدى سۇحباتتاسۋشى.

ساراپتامانىڭ ناتيجەلەرى قاشان شىعاتىنى بەلگىسىز. «مەن ولاردىڭ جۇمىستى باستاعانىن بىلەمىن. ساراپشىلاردىڭ ايتۋىنشا، بۇل كۇردەلى پروتسەسس. سۇيەكتەرى ناشار ساقتالعان»، - دەپ ناقتىلادى مۇحتاروۆا. ديرەكتوردىڭ ايتۋىنشا، دانياداعى ماماندار ساراپتامانىڭ ناتيجەلەرىن قازاقستانعا وزدەرى تانىستىرادى. «ولار ساراپتامانىڭ ناتيجەلەرىن كورسەتۋ ءۇشىن قازاقستانعا رەسمي تۇردە كەلمەكشى. ءبىراق ءبىز قازىر بۇل تۋرالى اسىعىپ وتىرعان جوقپىز»، - دەپ ءتۇسىندىردى مۇحتاروۆا. قازىر «التىن ادامنىڭ» سۇيەكتەرىنىڭ باسىم بولىگى «ەسىك» قورىق-مۋزەيىندە تۇر.