قازاقستان حالقى اسسامبلەياسىنىڭ دوستىق ەلشىلەرى تاعايىندالماق
ءوز كەزەگىندە بۇل باستامانى ق ر پرەزيدەنتى نۇرسۇلتان نازاربايەۆ قولدادى.
«نۇرسۇلتان ءابىش ۇلى، مەن ءسىزدىڭ جەرلەسىڭىز بولامىن. مەن ۋكراينادانمىن. ءسىزدىڭ ستۋدەنتتىك ءومىرىڭىزدىڭ ولكەسى دنەپروپەتروۆ وبلىسىندا تۋىپ، ءوستىم. ءوز ەلىمدە بولىپ جاتقان وقيعالار جۇرەگىمە ەرەكشە اۋىر تيۋدە. قازاقستان حالقى اسسامبلەياسىنىڭ قىزمەتى - بۇل بارلىق الەم ءۇشىن وشپەندىلىك پەن ءبولۋدى قالاي بولدىرماۋ، ادامداردى بىرىكتىرۋ، بەيبىتشىلىك پەن كەلىسىمدى ساقتاۋ كەرەكتىگىنىڭ ۇلگىسى. ءسىزدىڭ تاجىريبەنى سپورتقا ەنگىزۋ ارقىلى قازاقستاننىڭ سپورتتىق اسسامبلەياسىن قۇردىق، وسىلايشا بۇكىل الەم بويىنشا ءبىز جاستاردى بىرىكتىرۋدى كوزدەدىك. نۇرسۇلتان نازاربايەۆ مىرزا، قازاقستان حالقى اسسامبلەياسىنىڭ دوستىق ەلشىسى اتاعىن تاعايىنداۋدى ۇسىنامىن جانە مەن ونىڭ العاشقى ەلشىسى بولۋعا دايىنمىن» ، - دەدى دەنيس مينين.
ءوز كەزەگىندە مەملەكەت باسشىسى وعان: «قولدايمىن، بۇل ماسەلەنى شەشتىك دەپ ەسەپتە» ، - دەپ قىسقا قايىردى.
دەنيس مينين سپورتتى جانە وليمپيادا چەمپيوندارىن قازاقستان سەكىلدى بەلسەندى قولداپ كەلە جاتقان الەمنىڭ باسقا ەلدەرىن كورمەگەندىگىن ەرەكشە اتاپ ءوتتى. قازاقستان بويىنشا جۇزدەگەن سپورتتىق نىساندار سالىنۋدا. سوندىقتان بولار، قازاقستان بۇقارالىق سپورت پەن ونىڭ قولجەتىمدىلىگىن دامىتۋ بويىنشا ءبىرىنشى ورىندا تۇر، دەيدى سپورتشى.
اۆتور: جاسۇلان جولدىبايەۆ