ق ر پرەزيدەنتى: بەيبىتشىلىك پەن كەلىسىم قۇندىلىعىنىڭ ارقاسىندا كەز كەلگەن داعدارىستى ەڭسەرۋگە بولادى

استانا. قازاقپارات - بەيبىتشىلىك پەن كەلىسىم قۇندىلىعىنىڭ ارقاسىندا كەز كەلگەن داعدارىستى ەڭسەرۋگە بولادى.

 بۇگىن بەيبىتشىلىك جانە كەلىسىم سارايىندا ءوتىپ جاتقان قازاقستان حالقى اسسامبلەياسىنىڭ XXIV سەسسياسىندا ءسوز سويلەگەن ق ر پرەزيدەنتى نۇرسۇلتان نازاربايەۆ وسىلاي ءمالىم ەتتى. سەسسيا «تاۋەلسىزدىك. كەلىسىم. بولاشاعى ءبىرتۇتاس ۇلت» كۇن تارتىبىمەن اشىلعان بولاتىن.

سەسسيا بارىسىندا سويلەگەن سوزىندە ق ح ا ءتوراعاسى ن. نازاربايەۆ بۇگىنگى الەمدىك احۋالعا توقتالا كەلە، قازاقستانداعى جاعداي تۋرالى دا اڭگىمە ءوربىتتى. «ءبىز جاعدايىمىز جاقسى كەزەڭدەردە قور قۇردىق، شيكىزاتتىق تۇسىمدەردى الماستىرۋعا باعىتتالعان يندۋستريالاندىرۋدى قالىپتاستىردىق. ارينە، نەگە ەرتە باستامادىق دەيتىندەر بار. دەگەنمەن، يننوۆاتسيا مەن يندۋستريا تەك مەملەكەتتە قاراجات بار كەزەڭدە عانا جۇزەگە اسادى. ءبىز دە وسى جۇمىستى باستاۋ ءۇشىن قاراجات جينادىق. يندۋستريالاندىرۋدى دەر كەزىندە باستادىق.

بەس جىل ىشىندە 900 جاڭا كاسىپورىن قۇرىلدى. بيىل تاعى جۇزدەگەن كاسىپورىن اشىلادى. بۇرىن قازاقستاندا ەشۋاقىتتا بولماعان 500-دەن استام جاڭا ونىمدەر ءوندىرىلدى. ەكونوميكانىڭ ءوزى وسى باعىتقا قاراي وسۋدە. مىنە، داعدارىستىڭ ءوزى ءبىرتۇرلى. داعدارىس - جەتكىلىكسىزدىكتەن، باعانىڭ تومەندەۋىنەن ورىن الىپ وتىر. ال ونەركاسىپتىڭ فيزيكالىق اۋقىمى كەمىگەن ەمەس. سوندىقتان دا، بۇنداي جاعدايدا، قاراجاتتان، ءوزارا ساۋدا- ساتتىقتان بولەك، ءبىزدىڭ ەلىمىزدە سالتانات قۇرىپ وتىرعان بەيبىتشىلىك پەن كەلىسىمنىڭ قۇندىلىعى ارتا تۇسەدى. ءبىز وسىنداي قۇندىلىقتىڭ ارقاسىندا كەز كەلگەن قيىندىقتى ەڭسەرە الامىز»، - دەدى ن. نازاربايەۆ.

 «قايدان تۋىنداپ، قايدان پايدا بولعانىنا قاراماستان كەز- كەلگەن داعدارىستىڭ، كەز كەلگەن قاتەردىڭ تولقىنىنىڭ كەرى قايتاتىن كەزى بولادى. ول مىعىمدىلىقتىڭ، بىرلىكتىڭ ارقاسىندا، ەلىمىزدىڭ ەرىك- جىگەرىنىڭ ناتيجەسىندە كەرى قايتادى»، - دەدى ن. نازاربايەۆ.

اۆتور: قانات مامەتقازى ۇلى