اتىراۋ ىرگەسىندەگى تاريحي سارايشىق قالاسى جويىلىپ كەتۋى مۇمكىن
بۇل تۋرالى ەلىمىزدىڭ مادەنيەت جانە سپورت ءمينيسترى ارىستانبەك مۇحامەدي ۇلى سەنات دەپۋتاتتارىمەن كەزدەسۋدە مالىمدەدى.
ءمينيستردىڭ ايتۋىنشا تاريحي ورىن سۋ استىندا قالۋى مۇمكىن.
«بۇل ماسەلەنى باقىلاۋدا ۇستاپ وتىرمىز. سارايشىق - التىن وردانىڭ استاناسى بولعان تاريحي قالا. وكىنىشكە وراي، قازىر وندا جايىق وزەنىندەگى جاعدايعا وراي قيىندىق تۋىپ تۇر. سىزدەر بىلۋگە تيىسسىزدەر، مۇندا ناقتى شەكارالار بار. ياعني، قوجا احمەت ياسساۋي كەسەنەسى، تامعالى ەسكەرتكىشتەرى، ەسىك قالاسى سىندى تاريحي ورىندارعا ءبىز تىكەلەي جاۋاپتىمىز. ولار - رەسپۋبليكالىق قورىق، مۋزەيلەر بولىپ سانالادى. ال، سارايشىق قالاسى اتىراۋ وبلىسىنا قاراستى. وعان سولار جاۋاپتى. ەگەر وسىنداي اپاتتىق جاعداي قوجا احمەت ياسساۋي كەسەنەسىندە، وتىراردا بولسا، ءبىز ول ءۇشىن تىكەلەي جاۋاپتى بولار ەدىك. مۇندا ناقتى گراداتسيانى ءتۇسىنۋ كەرەك»، - دەيدى مينيستر.
تاريحي ورىننىڭ تاعدىرىن اتىراۋ وبلىسى باسشىلارىنا ىسىرعان مينيستر بۇل ماسەلەگە وراي وبلىستىڭ بۇرىنعى باسشىسى، بۇگىندە ءماجىلىس دەپۋتاتى بولىپ وتىرعان باقتىقوجا ىزمۇحامبەتوۆپەن اڭگىمەلەسكەنىن دە العا تارتىپتى.
سارايشىقتىڭ احۋالى الەۋمەتتىك جەلى قولدانۋشىلارىن دا از الاڭداتىپ وتىرعان جوق. Facebook الەۋمەتتىك جەلىسىندە جاندوس تەمىرعالي ەسىمدى قولدانۋشى تاريحي قالانىڭ سۋمەن شايىلىپ كەتۋى مۇمكىن دەپ دابىل قاعۋدا.
ونىڭ ايتۋىنشا، جىل سايىن تاريحي قالانىڭ ورنىن سۋ الاتىن كورىنەدى. سۋ كەرى قايتقاندا ونداعى تاريحي ەسكەرتكىشتەر دە شايىلىپ، ادامداردىڭ سۇيەكتەرى جەر بەتىنە شىعىپ قالاتىن كورىنەدى.