قىمىز بەتتى ارلەندىرەدى

استانا. قازاقپارات - قازاقتىڭ ۇلتتىق سۋسىنى - قىمىزدىڭ دەنساۋلىققا پايداسىن ايتپاعاندا، تەرى كۇتىمىنە دە جاعىمدى اسەرى كوپ.

سول سەبەپتى بۇگىندە ول كوسمەتيكا سالاسىندا كەڭىنەن قولدانىلا باستادى، دەپ جازادى massaget.kz.

ادام اعزاسىن، تەرىسىن جاسارتاتىندىقتان، قىمىزدان شاشقا ارنايى ماسكالار جاسالادى. ال گەرمانيادا قىمىزدان ءتۇرلى اتىرلەر مەن سابىندار جاساۋ ءوندىرىسى دامىپ كەلە جاتىر.

بەت تەرىسىن اعارتىپ، اجىمدەردى ازايتاتىن ماسكانى اركىم ءۇي جاعدايىندا وپ- وڭاي جاساي الادى. ونىڭ نەگىزىندە قىمىز بولادى. ماسكانى جاساۋ ءۇشىن 200 م ل قىمىز، جەلكەننىڭ ءۇش- ءتورت ساباعى جانە جارتى قيار قاجەت. جاسىل جەلكەن مەن قياردى بلەندەردەن وتكىزىپ، قىمىزبەن ارالاستىرامىز. مۇنداعى جاسىل جەلكەن بەتتى ارلەندىرىپ، كلەتكالاردىڭ بالعىن قالپىن ساقتايدى. ال قيار بەتتى ىلعالداندىرادى. ماسكا تاڭەرتەڭ جانە كەشكە جاسالادى. 20 مينۋت ۇستاپ، ارتىنان جىلى سۋمەن جۋۋ كەرەك. ءۇش كۇن سايىن جاساعان جاعدايدا ماسكانىڭ ناتيجەسى دە ايتارلىقتاي بولادى.

قىمىزدىڭ قۇرامىندا 28 ميكروەلەمەنت بار. بۇل سۋسىن اسىرەسە ۆ، س دارۋمەندەرىنە باي. ال اتالمىش دارۋمەندەر بەت تەرىسىنىڭ جاسۋشالارىن بايىتىپ، قارتايۋدىڭ الدىن الادى.