قازىر شاعىن جانە ورتاشا كاسىپورىنداردى دامىتۋعا باسا كوڭىل ءبولۋ قاجەت - ن. نازاربايەۆ
نۇرسۇلتان نازاربايەۆتىڭ «حيمفارم» ا ق كاسىپورنىندا بولعان كەزىندە اڭگىمە فارماتسيەۆتىك نارىقتى دامىتۋ پەرسپەكتيۆالارى جونىندە بولدى. ول مۇندا سەحتاردى ارالاپ، ۇجىممەن كەزدەستى.
بىزدەرگە ءدارى-دارمەكتەر جەتكىزگىسى كەلەتىن تۇركيانىڭ، ءۇندىستاننىڭ جانە يراننىڭ كومپانيالارىمەن باسەكەلەستىك كۇرەسىندە قارسى تۇرا الۋ ءۇشىن نەنى قولعا الۋ قاجەتتىگى ايتىلدى. «بۇرىن بۇل فابريكانىڭ ءوز دارىلىك شوپتەر پلانتاتسياسى بولاتىن. قازىر جوق. ورگانيكالىق شيكىزاتقا قايتا ورالۋ قاجەت. مەن سىزدەرگە قاراسورا جونىندە بەكەر ايتىپ تۇرعان جوقپىن. بۇل زاۋىت ەلىمىزدە تۇتىنىلاتىن ونىمدەردىڭ 50 پايىزعا جۋىعىن وندىرەدى. بىزدە يمپورت كوبىرەك، 1 ميلليارد دوللارعا جۋىق. كولەمدى ۇلعايتىپ، ەكسپورتتى اشىڭدار»، دەپ ۇسىنىس جاسادى نۇرسۇلتان نازاربايەۆ «حيمفارم» ا ق باسشىلىعىنا.
زاۋىت 200 دەن استام ءتۇرلى دارىلىك پرەپاراتتار مەن سپيرتتىك ەرتىندىلەر شىعاراتىنىن اتاپ وتكەن ءجون. وندىرىستىك قۋاتى 1,2 ميلليارد تابلەتكا، كاپسۋلالار، تۇيىرشەكتەلگەن ونىمدەر، 300 ميلليون امپۋلا، 40 ميلليون قۇتى انتيبيوتيكتەر جانە 26 ميلليون. شىرىندار. جىلىنا ءونىم قۇنى 16,5 ميلليارد تەڭگەدەن اسادى. ءسوز اراسىندا ايتا كەتەيىك، حالىقتى كەپىلدى ءدارى-دارمەكپەن قولداۋ اۋقىمىندا قولدانىلاتىن پرەپاراتتاردىڭ ۇشتەن ءبىرى «حيمفارم» كومپانياسىنان ساتىپ الىنادى.
ەل پرەزيدەنتى ساننان گورى ساپاعا كوڭىل ءبولۋ قاجەتتىگىن اتاپ ءوتتى. «ەڭ باستىسى، ساپاسى ناشار بولماسىن. ءبىز ادامداردى ەمدەيمىز عوي. كەيدە ءبىزدىڭ پرەپاراتتار پايدا بەرمەيدى دەپ جاتادى. ودان كەين باتىستىق پرەپاراتتاردى قابىلداپ، ادامعا جاقسى بولا باستايدى»، دەدى نۇرسۇلتان نازاربايەۆ كاسىپورىن باسشىلىعىنا قاراتا. زاۋىتتىڭ باس ديرەكتورى يجە ۋربانەتس شىمكەنتتىك دارىلەردىڭ ساپاسى جاقسى ەكەندىگىن ايتىپ اتالۋعا تىرىستى. ءبىر عانا «مۋكالتين» ءدارىسىنىڭ وزىنە ەشتەڭە تەڭ كەلمەيدى، دەدى ول.
«Azala Textile» ماتا كەشەنىندە بولعان كەزىندە مەملەكەت باسشىسى قازىر شاعىن جانە ورتاشا كاسىپورىندارعا باسا كوڭىل ءبولۋ قاجەتتىگىن ايتتى. مەملەكەت تە وسىعان مۇددەلى. «بۇل ورتاشا كاسىپورىن. ولار كوپ بولۋى ءتيىس. ءىرى كاسىپورىندار ادامداردى قىسقارتىپ، جۇمىسشىلاردى ازايتۋعا تىرىسادى. بۇل قازىرگى الەمدىك تاجىريبە، ءبىز دە سولاي جۇرەتىن بولامىز. ال وسىنداي شاعىن جانە ورتا كاسىپورىندار ادامدارعا كوپتەگەن جۇمىس ورىندارىن بەرەدى»، - دەدى نۇرسۇلتان نازاربايەۆ
زاۋىتتىڭ قۋاتى 2824 توننا ءجىپ، 13 ميلليون قۋما مەتر ماتا، 2 ميلليون توسەك-ورىن جيناقتارى جانە 7 ميلليون تۇكتى بۇيىمدار. وڭىردە وندىرىستەردى شيكىزاتپەن تۇراقتى قامتاماسىز ەتۋ ءۇشىن ماقتا القاپتارى ەگىسى كولەمى ۇلعايتىلۋدا. وتكەن جىلدىڭ قورىتىندىسىمەن وقو اۋماعىندا 99 مىڭ گەكتارعا ماقتا ەگىلدى، بيىلعى جىلى 110,6 مىڭ گەكتەراعا دەيىن ۇلعايتۋ جوسپارلانۋدا. وبلىس اكىمدىگى باسپا ءسوز قىزمەتىنىڭ مالىمەتتەرى بويىنشا، جەڭىل ونەركاسىپ سالاسىندا جالپى قۇنى 27,8 ميلليارد تەڭگەنىڭ 10 جوباسى جۇمىس ىستەۋدە. ولاردا 2,2 مىڭ جەرگىلىكتى مامان ەڭبەككە ورنالاستىرىلعان.