بيولوگتار انا ءسۇتىنىڭ قۇپياسىن اشتى

نۇر- سۇلتان. قازاقپارات - سيۋريح ۋنيۆەرسيتەتىنىڭ فيزيولوگيا ينستيتۋتى بيولوگتارى سۇتقورەكتىلەرىنىڭ ىشىندەگى ادام ءسۇتىنىڭ قۇرامى ەڭ كۇردەلى ەكەنىن انىقتاعان.

ونىڭ قۇرامىندا ەشقانداي جانۋاردىڭ سۇتىندە كەزدەسپەيتىن 200 گە جۋىق قانت بارىن ناقتىلاعان. انا سۇتىندەگى قانت مولشەرى مەن ءتۇرى سيىر سۇتىمەن سالىستىرعاندا ۇلكەن ايىرماشىلىقتى كورسەتكەن.

بۇل تۋرالى lenta.ru سايتى جازعان.

وقىمىستىلار انا ءسۇتىنىڭ قۇرامى بالانىڭ يممۋندىق جۇيەسىنىڭ كۇشتىلىگى، ونىڭ دامۋ ۇستىندەگى اسقازانى، ىشەك جولدارىنىڭ ساۋ بولۋىنا تىكەلەي بايلانىستى ەكەنىن ايتۋدا. بالانى ەمىزۋ كەزىندە قانت مولشەرى ارنايى بەلگىلەنبەگەن. سەبەبى جاڭادان تۋىلعان بالانىڭ اعزاسى ادامنىڭ ءبىر بولىگى، ياعني دامۋ ۇستىندەگى قۇبىلىسقا تولى.

سونداي-اق، انا ءسۇتىنىڭ قۇرامى مولەكۋلالارعا باي. ولار دامۋ ۇستىندەگى اعزاداعى ءوسۋدى تەجەيتىن نەگاتيۆتى اسەرى بار پاتوگەندەرگە قارسى تۇرادى. انا ءسۇتى سونىمەن قوسا بالانىڭ قان قۇرامىن قاجەتتى دارۋمەندەرمەن بايىتا تۇسەدى.

بالا دۇنيەگە كەلگەن ءبىر ايدىڭ ىشىندە انا ءسۇتىنىڭ قۇرامى وزدىگىنەن وزگەرە تۇسەدى. بۇرىنعىداي جاس اعزانى تازالايتىن قۇرامنىڭ ورنىنا نارەستەنىڭ يممۋندىق جۇيەسىن باستاپقىعا قاراعاندا كۇشەيتە تۇسەتىن ەلەمەنتتەر مەن دارۋمەندەرگە تولى بولادى. ءسۇت قۇرامىنداعى قانت تۇرلەرى دە ازايا تۇسەدى. ونىڭ ورنى ماي مەن جاس اعزاعا كۇش بەرەتىن، وسىرەتىن ەلەمەنتتەرگە تولىعادى.

انا ءسۇتىنىڭ قۇرامىنداعى تابيعي ءارى پايدالى دارۋمەندەردىڭ ارقاسىندا بالانىڭ تەز ءوسىپ، اۋرۋشاڭ بولمايتىنى راس. دەگەنمەن ءقازىر ءتۇرلى جاعدايلارعا بايلانىستى، زامانعا ساي ۇنتاقتار مەن بالالار تاماعى دا ءسابيدىڭ دۇرىس تاماقتانۋىنا، ءوسىپ جەتىلۋىنە كومەكتەسە الادى. دەگەنمەن انا ءسۇتى بالانىڭ ىشەك، اسقازان، ىشكى قۇرلىستارىنىڭ دۇرىس جەتىلۋىنە كومەكتەسىپ وسى اعزالارعا جانە تىنىس الۋ جولدارىنا تيەتىن اۋرۋلاردىڭ الدىن الۋعا بىردەن ءبىر تاپتىرماس شيپا بولا الادى. وقىمىستىلار انا ءسۇتىنىڭ ارقاسىندا كەز- كەلگەن ءسابيدىڭ قانداي جاعداي بولماسىن ساۋ ءارى يممۋندىق جۇەسى مىقتى بولاتىنىن ايتقانىمەن بالانى قانشا ۋاقىت ەمىزۋ كەرەكتىگىن ءدوپ باسىپ ايتا الماي وتىر. قازىرگە بالا ەمىزۋدىڭ ۋاقىتىن ءار انا ءوزى شەشەدى.

Stan.kz