قازاق بلوگەرى الەۋمەتتىك جەلىلەردى مۇلدەم جاۋىپ تاستاۋدى ۇسىندى

استانا. قازاقپارات - قازاق بلوگەرى ءارى جۋرناليست بەرىك سۇلتان الەۋمەتتىك جەلى ادامداردىڭ كوپ ۋاقىتىن الاتىندىقتان، ونى جاۋىپ تاستاۋدى ۇسىندى.

بلوگەر الەۋمەتتىك جەلىدەگى پاراقشاسىندا بۇل ۇسىنىسى قانداي وڭ ناتيجەلەر بەرەتىنىن ءتىزىپ شىقتى.

سونىمەن بلوگەردىڭ ويىنشا، ەگەر الەۋمەتتىك جەلى جابىلسا، تومەندەگى ارتىقشىلىقتارعا جول اشىلادى:

1. قازىر تەك چاتتاردا عانا جازىسىپ، «كورىنبەي كەتتىڭ عوي» دەسە، «لايك باسىپ ءجۇرمىن عوي» دەپ جاۋاپ بەرەتىن زامان بولىپ قالدى. الەۋمەتتىك جەلى جابىلسا، دوستارمەن ءجيى جۇزدەسىپ، شاي ءىشىپ تۇرامىز. جويىلىپ بارا جاتقان قارىم- قاتىناستى ءوز قالپىنا كەلتىرەمىز؛

2. بلوگپلاتفورمالار دامىپ، بلوگەرلەر بلوگ جۇرگىزە باستايدى. acebook‎F جەلىسىنە پوست جازىپ، بلوگەرمىن دەپ جۇرگەندەر وزدەرىنىڭ الەۋمەتتىك جەلى قولدانۋشى ەكەنىن تۇسىنەدى. بۇرىنعىداي تاقىرىپتىق بلوگتاردى دامىتامىز. جاقسىلاردىڭ جاقسى جازبالارىن ىزدەپ ءجۇرىپ وقيتىن بولامىز:

3. شەتەلدەن ‎اقشا الاتىن ساۋساعى بار ويى جوق ەرمەلەردىڭ پوست جازۋى توقتاتىلادى. ەلدى بۇلىككە باستايتىن شولاقبەلسەندىلەردىڭ ماعىناسىز سوزدەرىن ەشكىم وقىمايتىن بولادى، سول ارقىلى جاستاردىڭ ويىن تازا ۇستايمىز؛

4. نەگاتيۆ اقپاراتتاردىڭ تارالۋى بىردەن توقتايدى. سول ارقىلى حالىقتىڭ پسيحولوگياسىن ساقتاپ قالامىز؛

5. جۇمىس ىستەۋگە كوپ ۋاقىت بولادى. قازىر كوپتەگەن مەكەمە قىزمەتكەرلەرى كوپ ۋاقىتىن الەۋمەتتىك جەلى پاراقتاۋعا جۇمسايدى. سول ارقىلى كەيدە ونىمدەرى ساپاسىز بولىپ جاتادى؛

6. ۇيىقتاردا الەۋمەتتىك جەلى پاراقشاسىنا قاراپ ەمەس، ايەلىنە نە بالاسىنا قاراپ ۇيىقتايتىن بولادى. سول ارقىلى وتباسىلىق بىرلىك نىعايىپ، ماحاببات ارتادى. سەبەبى، قازىر «سەن ماعان قاراعاندا سوتكاڭا كوپ كوڭىل بولەسىڭ» دەگەن ايەلدەر پىكىرى كوبەيىپ كەتتى؛

7. الەۋمەتتىك جەلى جۇلدىزى دەگەن جالعان ‎اتاق قۇرىپ، شىن تالانتتار عانا ەل سۇيىكتىسىنە اينالادى. ونەرى جوق، ءبىلىمى جوق، اراق ىشەتىندەر جۇلدىز بولمايدى؛

8. گازەت- جۋرنالدارعا سۇرانىس ارتىپ، حالىقتىڭ ساپالى دۇنيە وقۋىنا جول اشىلادى؛

9. شالا ساۋاتتى شەيحتاردىڭ نەگىزسىز ۋاعىزدارى توقتاپ، جاستار ءدىني سۇراقتارىن مەشىت يمامدارىنان سۇرايتىن بولادى.

دەرەككوز: Nur.kz