استانادا اۆتوۆوكزالدا بوس جۇمىس ورىندار جارمەڭكەسى ءوتتى - فوتو
بۇل - بيىل وتكىزىلىپ وتىرعان وسىنداي ءۇشىنشى شارا. ساعات 11.00 دەن 13.00 گە دەيىن جۇمىسسىز جۇرگەن استانالىقتار الەۋەتتى جۇمىس بەرۋشىلەرمەن اڭگىمەلەسۋدەن ءوتىپ، قايتا دايارلاۋدان ءوتۋ جانە جاڭا ماماندىقتى مەڭگەرۋ تۋرالى اقپارات الدى، دەپ حابارلايدى اكىمدىكتىڭ باسپا ءسوز قىزمەتىنەن.
استانا قالاسى اكىمدىگىنىڭ «جۇمىسپەن قامتۋ ورتالىعى» ك م م ديرەكتورى ولجاس وماردىڭ ايتۋىنشا، بوس جۇمىس ورىندار جارمەڭكەسىن اۆتوۆوكزالدا وتكىزۋدىڭ وزىندىك ءمانى بار.
«اۆتو- جانە تەمىرجول ۆوكزالدارى اۋماعىندا ءوزىن-ءوزى جۇمىسپەن قامتىعان ازاماتتار جۇرەدى. ول پاتەرلەردى جالعا بەرۋمەن، جۇك تاسۋمەن اينالىسادى، جولاۋشى تاسىمالداۋ قىزمەتتەرىن ۇسىنادى جانە ت. ب. بۇل ولارعا ۇنايتىن دا شىعار، ءبىراق ءبىزدىڭ ماقساتىمىز ولاردى جۇمىسپەن ناتيجەلى قامتىلۋعا تارتۋ، بەرەكەلى بولاشاققا قول جەتكىزۋ ءۇشىن زەينەتاقى اۋدارىمدارىن جاساۋ قاجەتتىلىگىن ءتۇسىندىرۋ. سونداي- اق، بالاما جۇمىس ورىندارىن ۇسىنامىز. جۇمىسپەن قامتۋ ورتالىعىنا حابارلاسۋعا ولاردىڭ ۋاقىتى بولماعان شىعار، ال مۇندا از عانا ۋاقىتتىڭ ىشىندە ونداعان جۇمىس بەرۋشىمەن كەزدەسىپ، تۇيىندەمەلەرىن قالدىرادى، الدىن الا اڭگىمەلەسۋدەن وتەدى»، - دەدى ولجاس ومار.
شارا بارىسىندا 20 جۋىق جۇمىس بەرۋشى قىزمەت كورسەتۋ سالاسى، ءبىلىم بەرۋ مەكەمەلەرى، دەنساۋلىق ساقتاۋ ۇيىمدارى، قۇرىلىس فيرمالارى، قوناق ۇيلەر، اۆتوپاركتەر، ىشكى ىستەر ورگاندارىنان بوس جۇمىس ورىندارىن ۇسىندى. بوس ورىندار جارمەڭكەسىنە ءوزىن-ءوزى جۇمىسپەن قامتىعانداردان باسقا، ۆوكزال قىزمەتكەرلەرى مەن باسقا دا قالا تۇرعىندارى قاتىستى.
«مەن اۆتوۆوكزالدا سانتەحنيك بولىپ ىستەيمىن، ءبىراق باسقا ۇيىمداردا بوس ورىن بار ما ەكەنىن سۇرادىم، ولاردىڭ قانداي تالاپتار قوياتىندارىن ءبىلدىم. ەكى جەرگە تۇيىندەمە قالدىردىم. كەشكى ۋاقىتتا نەمەسە دەمالىس كۇندەرى قوسىمشا قارجى تاباتىن جۇمىس تابىلىپ قالار» ، - دەيدى عابدۋل قۇلىنتايەۆ.
جارمەڭكەگە كەلگەندەردىڭ ءبىرىنىڭ ماماندىعى بۋحالتەر، ءبىراق ونىڭ جۇمىس ءوتىلى از. سول ءۇشىن ول ءتورت جىلدان بەرى جۇمىسقا ورنالاسا الماي ءجۇر.
«بوس ورىندار جارمەڭكەسى تۋرالى كەزدەيسوق ەستىدىم. ءسويتىپ، باعىمدى سىناپ كورەيىن دەدىم، «سەسنا- استىق» ج ش س تۇيىندەمەمدى قالدىردىم، ولارعا تاۋارتانۋشى كەرەك ەكەن، مەنىڭ بۇل ورىنعا لايىقتى ەكەنىمدى ايتتى»، - دەدى قالا تۇرعىنى.
سونىمەن قاتار، بوس جۇمىس ورىندار جارمەڭكەسىندە جۇمىسپەن قامتۋ ورتالىعىنىڭ ماماندارى «جۇمىسپەن قامتۋ جول كارتاسى 2020» باعدارلاماسىنا قاتىسۋ تۋرالى ازاماتتاردىڭ سۇراقتارى بويىنشا قايتا دايارلاۋ جانە جاڭا ماماندىقتى مەڭگەرۋ مۇمكىندىكتەرى تۋرالى كەڭەس بەردى، جاستار پراكتيكاسىنان ءوتۋ، حالىقتىڭ نىسانالى توپتاعى تۇلعالارىنا الەۋمەتتىك جۇمىس ورىندارىنا جۇمىسقا ورنالاسۋعا بولاتىنى تۋرالى ايتىپ بەردى.
سونداي- اق، استانا قالالىق پروكۋراتۋرا جانە جۇمىسپەن قامتۋ، ەڭبەك جانە الەۋمەتتىك قورعاۋ باسقارماسى قىزمەتكەرلەرى ازاماتتاردىن ەڭبەك سالاسىندا كونستيتۋتسيالىق قۇقىقتارىن قورعاۋعا ارنالعان «اشىق ەسىك كۇنىن» وتكىزدى.