تۋريستىك كومپانيالار شىنجاڭ ايماعىنداعى ارىپتەستەرىمەن ءوزارا كەلىسىمگە كەلدى

استانا. قازاقپارات - ورتالىق ازيا ەلدەرى ءوزارا ترانس شەكارالىق تۋريزمدى دامىتۋعا مۇددەلى.

بۇل ماسەلە «قورعاس» قازاق-قىتاي شەكارالىق حالىقارالىق ىنتىماقتاستىق ورتالىعىندا وتكەن فورۋمدا قارالدى.

شاراعا 100 گە جۋىق ساراپشى مەن تۋريستىك كومپانيانىڭ وكىلدەرى قاتىستى. ولار ىنتىماقتاستىقتىڭ باسىم باعىتتارىن ايقىنداپ، شەكارالىق تۋريزمنىڭ جاڭا باعدارلارىن تالقىلادى.

قازاقستاندىق تۋريستىك كومپانيالار قىتايدىڭ شىنجاڭ ايماعىنداعى ارىپتەستەرىمەن ءوزارا ىنتىماقتاستىق جونىندەگى كەلىسىمگە قول قويدى.

قازىردىڭ وزىندە «قورعاس» شەكارالىق ىنتىماقتاستىق ورتالىعىندا ەلىمىزگە ءوتىپ، دەمالامىن دەگەن قىتايلىقتاردىڭ سانى ارتقان. ولار كيىز ۇيگە توقتاپ، سۋرەتكە تۇسەدى ۇلتتىق تاعامداردان ءدام تاتادى. اسىرەسە، قازاقستاندىق بالمۇزداقتاردى ءسۇيسىنىپ جەيدى.

ۆان كۋەي، تۋريست:

- ءبىز قازاقستان جاققا ءوتىپ، ۇلتتىق تاعامداردى جەگەندى ۇناتامىز. بۇگىن دوستارىممەن كەلىپ، كيىز ءۇيدىڭ قاسىندا سۋرەتكە تۇستىك. تازا ءونىم بالمۇزداقتان ءدام تاتتىق. ساياحاتتاعاندى جاقسى كورەتىن قىتايلىقتار ءالى كوپ كەلەدى دەپ ويلايمىن.

حۋان ليپين، ينۆەستيتسيالىق كومپانيانىڭ ديرەكتورى:

- ءبىز قازاقستان مەن قىتاي حالىقتارىنىڭ اراسىنداعى دوستىق قارىم-قاتىناستىڭ ارتۋىنا ۇلكەن كۇش سالىپ جاتىرمىز. تۋريستىك سالاداعى جۇمىسىمىز سوعان تۇرتكى بولۋدا. ويتكەنى ساياحاتتاۋشىلار وزگە حالىقتىڭ مادەنيەتىمەن تانىسىپ، جاقسى تۇسىنىستىك ورنايدى.

www.24.kz